Сумар дня на 22. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 22. листопада/новембра 2021 р.

Просте і згідне з новыма трендами – так презентує ся нове лоґо реґіону Вышній Зепмлин 

Реґіон Вышній Зепмлин буде репрезентувало нове лоґо. При його творіню Областна Орґанізация Туристичного Руху (ООТР) Вышній Земплин і Вышній Шариш выходила з первістной версиі, котра была хоснувана до 2012 рока. Як інформувала аґентуры TASR, нове лоґо подля Михаелы Здражыловой, директоркы ООТР Вышній Землин і Вышній Шариш, вказує вшыткы важны атрибуты той териториі, котры сут упорядкуваны в штырьох обшырях: істория, культура, природа і вода. Історию репрезентує деревяный храм, природу латиньска буква «P», яка представленя єст в такій спосіб, жебы навязувати до карпатскых буковых пралісів. Вода представлят дальше найбільше богатсво реґіону. Послідня обшыр – культура, має просту форму і інспірувана єст штуком pop-art і його найславнійшым представником, Енді Варгольом. Як подала Здражылова, головном причыном редізайну лоґа єст допасуваня ся до актуальных трендів. Візуальна ідентифікация єст барз важным елементом, котрый репрезентує реґіон.

Неодолга в ґміні Санкова зачнут ся контролі палениск в ґаздівках

Контролі проходити будут в рамках дотримуваня тзв. антисмоґовой уставы Малопольского Воєвідства. Контроля єст обовязком ґміны, што выходит з записів в Проґрамі Охороны Повітря. Контролі ведены будут урядниками ґміны, котры будут мати іменны дозволіня од Війта. Додатково разом з нима ведена буде інформацийна акция на тему можливости стараня ся о дофінансуваня до выміны джерел тепла в рамках Проґраму Чысте Повітря. В часі контролі провірены будут кляса і тип джерела тепла, якіст хоснуваного палива і можливіст спаляня одпадів. В примірі обґрунтуваного підозріня урядникы возмут пробку попелу до бадань.

«Шлезскій непокірный» спільна дискусия 

Форум Публичного Діалоґу і Стоваришыня для Розвитку Громадяньской Спільноты PRO HUMANUM, при вспілпрацы з Фондом Розы Люксембурґ, просят на дебату пн. «Шлезскій непокірный» на тему будучого шлезского языка. Од років тырвают пробы узнати шлезскій реґіональным языком і вписати го до Уставы о нацийональных і етнічных меншынах та о реґіональным языку. На стрічы запрошены гості спрібуют одповісти на ріжного типу звіданя і проблемы, м.ін. як шлезскій язык влият на культурову памят, ци має шансы перетырвати або ци державна поміч єст до того потрібна. Подія пройде 26. листопада/новембра в онляйновій формі. Деталі находят ся на фейсбуковій страні подіі.

Продолжыня робіт на дорозі нр 1510 К Берест – Мохначка Выжня

Не так давно інформували сме о утруднінях звязаных з ремонтом повітовой дорогы нр 1510 К Берест – Мохначка Выжня. Працы будут тырвати долше, і за Повітовым Зарядом Доріг в Новым Санчы – ведены будут іщы днес, 22. листопада/новембра в год. од 8.00 до 16.00. В звязку з тым дорога буде закрыта для руху од крижівкы з воєвідском дорогом 981 на долгости ок. 800 м. Пропонуваный обізд іде державном дорогом нр 75 і воєвідском дорогом нр 981. Залежно од погоды термін закрытя дорогы може быти зміненый.

На трасу медже Бічом а Яслом вернули потягы

Закінчыл ся тырваючый од пару місяців ремонт желізницьовой леніі медже Бічом а Яслом. Уж в пятницю, 19. листопада/новембра, вернули потягы. Як повіл для Радия Краків бургомайстер Біча, Мирослав Вендрихович, думат він, же завдякы одновліню леніі буде она частійше хоснувана. На тоту хвилю штоденні ходят два потягы в Бєщады і два до Кракова. Бургомайстер надіє ся, же неодолга буде іх більше.