Сумар дня на 24. січня/януара 2022 р.

Приносиме вам сумар медияльной ґрупы ЛЕМ.фм+ на ден 24. січня/януара 2022 р.

Близко 150 примірів лемківского облечыня трафило до музею в Монастырисках

Музей на Тернопільщыні отримал збірку близко 150 примірів лемківского облечыня. Колекцию передал Вільям Джула, бывшый голивудскій проєктант кроів і колекцийонер давного лемківского облечыня. Як подала директорка музейного комплексу «Лемківскє село», до котрого трафила колекция, одтепер музей як єдиный на цілій Украіні буде міг похвалити ся таком выставом, зато же в склад одданых облечынь не входят лем ориґінальны, часто маючы і 100 років, але тіж такы, котры запроєктувал на основі архівальных документів сам Вільям Джула. За єй словами, збірку допоміг передати Владек Максимович, котрый має лемківскє коріня. То він сфінансувал транспорт обєктів, якы сут тепер в музейным комплексі в Монастырисках. В колекциі находит ся так жіноче, як і мужскє облечыня, котре жде на докладне описаня і документацию. Вступні уж в марци збірку буде можна обзерати на выставі в музейным комплексі «Лемківскє село в Монастырисках».

Спір при санітарній вытинці дерев в Креници 

В Креници на початку січня/януара в Здройовым Парку зачала ся санітарна вытинка дерев. Нівелюваны сут сухы, стары ци хворы дерева, котры можут быти джерелом інфекций, што може пошкодити інчым рослинам в парку. Додатково, такы дерева сут загорожыньом, зато же можут ся вломити в часі сильных вітрів ци просто великых снігів. Вытинка не подабат ся жытелям Крениці, котры підтримуют, же вытяли не лем хворы, але тіж і здоровы дерева, особливо іглясты. Додают тіж, же тепер в парку не находит ся так дуже дерев, в результаті чого парк стратил на своій красі. Становиско в тій справі забрал бургомайстер Крениці Пьотр Рыба, якій поінформувал, же дерева до вытинкы кваліфікуваны сут лісниками, котры докладні обзерают кажду рослину. Вытяты дерева были головні заінфекуваны грибом, але тіж дуже з них было ушкодженых ци небезпечні похыленых. Додал тіж, же некотры дерева были усуваны, жебы забезпечыти рівномірный буково-ялицьовый розвиток.

Будова видоковой вежы в Мошеници коло Ґорлиц опізнит ся

Початково ґміна Мощениця на будову новой атракциі отримала понад піл мілийона злотых з Урядового Фонду Польскій Лад. Єднак, як ся вказало, пропозициі зложены фірмами в конкурсі оферт міцно перевысшают зарезервуваны на тоту ціль середкы. Війт ґміны Єжы Валенґа не тратит єднак оптимізму. Плян реализациі інвестициі єст уж накресленый, а зима то не найліпшый час, жебы зачати будову. Передвидує він, же до кінця червця/юнія ґміна порадит си з формальностями, а пак можна буде зачати будову. Кєд добрі піде, обєкт можна буде удоступнити од 2023 рока. Вежа стояла буде в найвысшым пункті на обшыри ґміны, де при добрій погоді мож буде видіти не лем Татры, але тіж Бєщады.

«Доткний світла» – Прогулька Коронами Дерев в ночы 

Єдну з найбільшых туристичных атракций по словацкій страні Карпат – Прогульку Коронами Дерев в Бахледці, мож тепер обзерати в новій одслоні пн. «Доткний світла». Од недавна з атракциі мож корыстати тіж і в ночы. Плятформу освітлят коло 55 тис. лямпок, котры дают можливіст спацерувати і обзерати Татры в нічных годинах. На таку прогульку мож ся выбрати 3 дни в тыжни – в віторок, пятницю і неділю, в годинах од 16.00 до 20.30. Можливіст спацерувати при світлах буде доступна до кінця зимового сезону.