Перша «Бесіда» за 2022 рік – уж в вашых хыжах

В тых днях вышло нове чысло часопису Стоваришыня Лемків – «Бесіда», ч. 1 (184) за місяці січен/лютый 2022 р.

В першым тогорічным выданю можеме чытати м.ін. статі:

• Lýdia Budayová, Andersenove rozprávky už aj v rusínskom jazyku;
• Наталія Малецка-Новак, Kto robi, a kto… no właśnie, co?;
• Наталія Малецка-Новак, МВСіА розділило грошы. Новы-стары проєкты лемківской меншыны;
• Андрий Ковальскій, XIV Стрічы Трьох Поколінь з Лемківском Культуром;
• Андрий Копча, Никыфор зас в Варшаві;
• Петро Трохановскій, Жыва Памят;
• Севериян Косовскій, Архів Апостольской Адміністрациі Лемковины доступный од рукы;
• Петро Трохановскій, Минуло 100 років од народжыня Василя Сочкы-Боржавина;
• Севериян Косовскій, Вмер Штефан Телеп (1957-2021), знаный лемківскій маляр. 

Окрем спомянутых статій, почытати годны сме постійну част «Новины, не новины – не лем з Лемковины», де розписаны сут найважнійшы подіі з лемківского і загальнорусиньского світа за остатні два місяці. Публикуваных є пару польскых і словацкых дописів, якы нашли ся в части «З доступной пресы».

В посліднім номері нашли ся желаня для Адама Барны, з нагоды прекрасного ювілею прожытых 95 років. Жычыня передают о. прот. Любомир Воргач, парох церкви Воскресіня Господнього в Ліґници, Парафіяльна Рада, церковный хор, прихожане та близкы і знаємы. Ґу желаням прилучат ся Головный Заряд Стоваришыня Лемків і Редакция часопису «Бесіда».

Цікавым є, што можеме прочытати єдно з оповідань Павла Ксенича, сучасного лемківского писменника, котрый по даякым часі вертат зо свойом творчістю на шпальты часопису. «Дякуєме, Павле, же ослебодил єс ся од должезного молчаня, же верташ до слова, до бесіды. І до Бесіды. (Редакция)» – пише ся під текстом Ксенича.

В части «З выдавничой поличкы» находит ся підготовлена Петром Трохановскым рецензия книжкы Павла Роберта Маґочія під наголовком «Підкарпатська Русь: Формування національної самосвідомості (1848-1948)».

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.