Нова «Бесіда»: упамятніня 75. річниці выгнаня і наша штоденніст

Перед Великодньом явил ся друком дальшый номер часопису Стоваришыня Лемків – «Бесіда», ч. 2 (185) за місяці марец/квітен 2022 р.

Гевсе чысло припоминат нам о ближучых ся Святах і о 75. річници нашого выгнаня з рідной Лемковины. Тым більше, што під конец квітня/апріля упямятниме в Біличній, Устю Рускым і Ґорлицях тоты смутны подіі.

В посліднім выданю прочытаме м.ін. статі:

• Севериян Косовскій, Ґорлицкій бурсак дoктор габілітуваный Павел Малецкій;
• Демко Трохановскій, Зобраня членів Руской Бурсы;
• Петро Трохановскій, Ясный Ювілей трудолюбивого Жытя (до 70-ой річниці народжыня Павла Стафиняка); 
• Севериян Косовскій, Світло в тунели? Омбудсман заскаржыл новелизацию, яка збльокувала зворот лемківскых лісів;
• Андрий Копча, 75 років…;
• Севериян Косовскій, Недожытых 90 років Павла Стефановского, вірного сына Лемковины;
• Петро Трохановскій, Минуло 100 років од народжыня Семана Мадзеляна.

В новым выданю находят ся тіж комунікаты, котры были выданы через лемківскы/русиньскы орґанізациі против напасти Росийской Федерациі на Украіну. Чытати мож выголошыня Стоваришыня Лемків, Стоваришыня «Руска Бурса» в Ґорлицях, Світовой Рады Русинів, Округлого Стола Русинів Словациі, Президента Карпаторусиньского Общества в США Джона Ріґетті, Підкарпатскых Русинів, Карпаторусиньского Наукового Центра і русиньскых писателів.

Стоваришыня Лемків інформує і о акциі «Лемкы Украіні», яка має на ціли збірку фондів на гуманітарну допомогу жытелям Украіны. Акция ведена є спільно з інчыма середовисками Карпатскых Русинів во світі.

В звязку з блужучом ся 75. річницьом початку Акциі «Вісла» Стоваришыня Лемків припоминат і кличе на орґанізуваны упамятніня, якы пройдут 30. квітня/апріля в Біличній (14.00 год.), в Устю Рускым (15.00) і Рускій Бурсі в Ґорлицях (17.00 год.).

В новій «Бесіді» нашли ся і желаня для першой учытелькы лемківского языка по 1989 р. і авторкы першой лемківской ґраматикы, Мирославы Хомяк.

В части «Одышли од нас/Попращали мы» можеме чытати спомины на долголітню членкыню Стоваришыня Лемків і учытельку лемківского языка в Пшемкові, Марию Броду. Споминаме і на жытя двох братів (помершых єден за другым в короткым часі), др. Ігоря Рыдзанича і Олега Рыдзанича, якы своім жытьом внесли вклад в лемківску культуру.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 09.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.