Біциґльом через EuroVelo 11 на Словацию уж без кварантанны. Але не лем ровером

На Словацию мож выбрати ся уж без перешкід, бо сусідска держава резиґнує з ограничынь звязаных з коронавірусом. Мож примірово сміло схоснувати біциґльовы лавкы на трасі EuroVelo 11, якы получыли русиньскы села по обох странах границі.

Біциґлисты можут переіхати ся мальовничом трасом вздолж Попраду раз по польскій, раз по словацкій страні, але так ци сяк русиньскыма селами, і то без обовязку реґістрациі на портали eHranica.

Без реґістрациі – ци то лем транзитом, ци на долше

Од 6. квітня/апріля словацкы власти зрезиґнували з обовязковой реґістрациі осіб, якы хотіли віхати на обшыр державы, знесли кварантанну для тых, якы не приняли вакцины, і конечніст вказувати ковідовы пашпорты.

Фурт єднак обовязуют масочкы в публичных запертых просторах, такых як склепы, уряды, спортовы ци культурны обєкты, та вчас масовых подій, а тіж в публичным транспорті.

Вшыткы польско-словацкы граничны переходы для особового і товарового руху сут наново одкрыты.

EuroVelo 11 русиньскыма селами

Інформация о знесіню ограничынь певністю втішыт біциґлистів, котры уж рыхтуют ся зачати сезон, а тот мож зачати од прогулькы мальовнычыма трасами EuroVelo 11.

Выбраный єй фраґмент з Мушыны до Мнишка над Попрадом веде двома лавками над ріком Попрад, котры лучат русиньскы села: Леґнаву з Миликом та Андриівку з Малым Липником. Ціла прогулька то дакус веце як 28 км, што може быти пропозицийом на родинну прогульку близко природы і красных видоків.

Пропозиций трас вызнакуваных в рамках EuroVelo 11 може быти веце, в залежности од можливости. Для барже вправленых одповідня може быти траса з Мушыны через Леґнаву, Липаны аж до Сабинова получена зо звиджаньом місцевых атракций, такых як джерелко мінеральной воды в Леґнаві ци забудова Сабинова.

EuroVelo 11

EuroVelo то сіт роверовых трас, якы лучат европейскы місця по цілым континенті. Будувана є од 1994 рока. Складат ся зо 14 долгодистансовых трас, а цілковита долгіст по єй скінчыню буде выносила 70 тис. км.

Єдном з трас є EuroVelo 11, яка розтігят ся од пілнічно-східнього кінця Норвеґіі до сонечной Грециі. Чыслит 6550 км і веде через 11 держав: Норвеґію, Фінляндию, Естонію, Латвію, Литву, Польщу, Словацию, Мадяры, Сербію, Пілнічну Македонію і Грецию. Словацка част зачынат ся в надграничным селі Тырстене коло Горнаду і веде східньом частю державы через Кошыці, Пряшів, Стару Любовню аж до переходу в Чырчу, де в Лелюхові переходит на польску страну. Дале траса EuroVelo 11 веде долином Попраду до Нового Санча і дале вызначена є через Тарнів, Краків, Кєльці, Варшаву, Ломжу до переходу в Душници з Литвом.

Фот. Фб-профіль ЗнайКрай