Никыфор. Малярство

Цілы вакациі мож в Пєніньскым Музею в Шляхтовій видіти выставу пн. «Никыфор. Малярство». Вернісаж прошол 14. червця/юнія тр.

«Никыфор был міцно емоцийні звязаный в Креницьом і з Лемковином, де мешкал і творил, котрых видокы высловил в малярстві в спосіб так красный і особистый як нихто скорше» – запрашат Збіґнєв Волянін, куратор Музею Никыфора в Креници.

Епіфан Дровняк (1895-1968), Лемко з Крениці, в цілым світі знаный є як Никыфор Креницкій. То єден з найвыдатнійшых в істориі малярства артистів з кругу штукы называной наівным малярством. «Певністю є єдном з найбарже нештоденных персон штукы ХХ ст. в Европі» – подає З. Волянін.

Мастер зоставляня кольорів

Малярства вчыл ся Никыфор сам од наймолодшых років. Думал, што кєд має талант, то єст зобовязаный малювати для тых люди, што малювати не знают. Мал абсолютну малярску інтуіцию, котра дозваляла му безблудні зоставляти фарбы, творити кольористику, што ся ньом дотепер захоплюют выдатны знавці малярства.

Рішуча векшіст образів Никыфора то акварелі і в тій техніці намалювал в меджевойню роботы, якы узнаваны сут за його найліпшы творы. В пізнійшым часі хоснувал тіж ґваш і кредкы. Рисункы зроблены олівком сут ескізами послідніх років жытя.

Дровняк, Новосільскій, Варголь

Сідячы годинами на мурку в Креници, прібувал продавати своі малюнкы як памяткы з Крениці. В тамтым часі не находил зрозумліня для свойой штукы. Аж знаєміст з Анджейом і Елльом Банахами принесла му выставы, дописы о ним, аж і славу.

В послідніх роках жытя, коли был уж досправды розпознаваный, дочекал ся выставы в Варшаві в ґалериі «Zachęta» в 1967 р., на котрій своі роботы вказувал тіж м.ін. Юрий Новосільскій.

Днес мено Дровняка появлят ся в єдным шорі ци то як раз з Новосільскым, ци Варгольом, як найвеце знаныма малярями лемківского походжыня.