Вігорлатьскый музей має за собов успішну сезону

Вігорлатьскый музей в Гуменнім закінчів ку 30-му септембру 2022-го року літню музейну сезону. Наперек непрязным дослідкам протипандемічных наряджінь в попередніх роках, інштітуція може похвалити ся в рамках тогорічной літньой сезоны рекорднов навщівностьов.

„Музей тым потвердив добрі выбрату маркетінґову стратеґію ословліня людей музейным портфоліом подій, успішно закінчів і обнову каштеля,“ інформовала за музей Яна Федічова. Актуална сезона была закінчена у співпраці з Містьскым културным центром в Гуменнім концертным проґрамом чеського орхестра Virtuosi di Praga в рамках меджінародного музичного фестівалу Pontes 2022.

Рекордна навщівность

Вігорлатьскый музей заперать сезону за період місяців май – септембер 2022 успішно. Помострити собі його експозіції пришло 27 412 людей із Словакії і заграніча.

В порівнаню з єднакым періодом минувшого року тото чісло наросло о майже 14 і пів тісяч навщівників. Із загранічных найвекшу ґрупу творили навщівници з Чеськой републікы, Польщі, Мадярька, але были і навщівници споза моря. Тогорічна кількость навщівників за літній період є докінця высша як навщівность музея за цілый попереденій рік.

Навщівників притігать каштель і сканзен

Основнов музейнов понуков і тот рік од мая до септембра были експозічны просторы, конкретно умелецько-історічна, сакрална, природонаучна експозіція в каштелю, і експозіція народной архітектуры і бываня (сканзен, де суть і памяткы з русиньскых сел реґіону), котры почас літя навщівило майже 18 600 навщівників.

Найвыглядаванішов была знова умелецько-історічна експозіція в каштелю, збогачена о множество цінных новых збірковых аквізіцій. Експозіція притягла майже 8000 навщівників.

Окрім постоянных выстав музей заінтересовав і різныма выставныма проєктами, орґанізованьом традічной Карпатьской писанкы, але і вшелиякыма зажытковыма подіями, концертами, творчіма варштатами або фестівалами.

Наприклад День традічных ремесел в сканзені Вігорлатьского музея, котрый быв присвяченый школярям, навщівило почас єдного дня майже тісяч школярів матерьскых, основных і середніх школ Пряшівского і Кошыцького самосправного краю.

Рихтують публікації

Актуално в мімосезоннім періоді музей приготовлює выставны проєкты, освітні проґрамы про діти, а на кінцю рока події про шыроку публіку в области історії, традіцій і кумшту.

Єдночасно музей приготовлює новы публікації, котрыма хоче інштітуція продовжовати в успішных музейных публікаціях, як і календарьовы выданя, котры в минулости вже здобыли оцініня.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА