«Слово» – 21-ша неділя по Сошествії Святого Духа – неділя, 9.00 год.

Образный приклад о россівачови нам з єдной стороны говорить о чоловікови, котрый вышов на своє поле россіяти своє зерно, а з другой о різной катеґорії той землі.

Коли сіяв єдно зеренко, пало на край дорогы, де было потоптане, і де його небесны птахы выдзьобали. Друге пало на камянисту землю, такой взышло, но кедьже не мало коріня, высохло. Третє до терня, тыж выросло, но терня выросло з ним і задавлио го. Аж четверте, котре пало до доброй землі, принесло плод.

Мы ся можеме вєдно з учениками звівовати Ісуса, што значіть тот образный приклад? А Ісус дав одповідь ученикам, а давать і нам.

Россівач є Сын чоловіка, котрый вышов од Отця і пришов на землю, жебы россівав своє зерно – то є своє слово. Та земля суть людьскы сердця. Кажде є інше. У тых, што на край дорогы – прийдуть і до церькви, послухають, но не на то, жебы увірили, але жебы може скрітіковали священика, высмівали ся його словам. Самы сі притім не усвідомляють, же сам діавол приходить, а кедьже суть отворены про нього, краде їм зо сердце поссіяне.

Зясь друга катеґорія – камяниста земля – суть тоты, што з радостьов слухають, може, коли чітають події зо жывота святых і собі полачуть. І молять ся і постять. Чом же тогды не принесуть плоды? Бо суть до часу. Коли настане про тото слово переслідованя, высміваня, або треба принести жертву, себеодречіня, уж бунтують ся. Одходять од молитвы і од Господа Бога. А так не принесуь плоды.

У тых, што до терня подобны як тоты перед нима, старають ся вести перед людьми досконалый жывот, но вєдно з тым у них ростуть і страсти – наприклад переїданя, не стриманость в їдлі, любов ку богаству, пінязям, карьєрі за кажду ціну, своїй красоті тіла ці облечіня, або є то гнів, пыха, порожня слава. Тоты страсти роснуть вєдно з ним і поступно го перемагають і задавлюють, і так не принесе таке сердце плоды хрістіаньского жывота.

Лем єдна катеґорія принесе плод, котры із добрым і чістым сердцьом выслухають слово, сохраняють го і приношають плоды в терпеливости. Не лем сохраняють, але старають ввести до жывота тоты слово. Так, як то робила Марія.

Смотьме і мы на їй приклад, жебы сьме были тов плодоноснов земльов, котра выдасть свої плоды. Слава Ісусу Хрісту!

В неділю, 6. новембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. новембра 2022 р. о 12.00 год. і 7. новембра 2022 р. о 2.00 год. за русиньскым часом.