Сумар дня на 18. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2022 р.

В Мушыні хотят побудувати ґондольову колейку

Мушына плянує чергову інвестицию, яка бы мала быти великом атракцийом для туристів. Ґміна хоче побудувати ґондольову колейку, яка получыт мушыньскє Запопрадя з гором Мальник. Нижня стация колейкы мала бы ся находити в околици мушыньскых загорід, што позволит туристам при нагоді хоснуваня колейкы одвидіти і інчы рыхтуваны ґміном атракциі. Як подал для радия RDN бургомайстер Мушыны Ян Ґольба, выкуп ґрунтів і рыхтуваня під отриманя середовискового рішыня сут заавансуваны. Тото само тыкат рыхтуваня концепциі. Наступным кроком є середовискове рішыня, залежне од того, де будут ся находити підпоры. Дальше треба буде найти пінязі – при чым колейка мала бы быти ґмінном інвестицийом. Ґміна буде ся старала о дофінансуваня проєкту на початку будучого рока. Кєд вшытко піде згідні з пляном, будова колейкы рушыт в 2024 році. Іщы скорше на верху Мальника стане видокова вежа, якой будова має ся завершыти в 2023 р.

В Новым Санчы одкрыют Центр Діалоґу

В Новым Санчы хотят одкрыти Центр Діалоґу, якій приближыт жытелям вельокультурову історию реґіону. Є то ініциятива Стоваришыня Сандецкій Штетль. В ценрі будут ся находити богаты колекциі зобраны Сандецкым Штетльом через рокы фунґуваня. Сут то предметы звязаны і з історийом жыдівской соспільности, яка колиси жыла в Новым Санчы і Сандеччыні, і з історийом і традицийом інчых нацийональных меншын, Лемків, Ромів, а тіж представників другых конфесий. Як подал віцепредседа Сандецкого Штетля Артур Фрончак, центр буде доступный для вшыткых заінтересуваных богатом культуровом дідовизном Сандеччыны. Окрем того будут ся там стрічати з волонтерами ци орґанізувати школіня. Не знатя іщы, коли центр мал бы быти одкрытый. Нанятый од міста локаль мусит быти перше пристосуваный до потреб Стоваришыня, закля будут го мочы одкрыти для жытелів міста.

Апель до жытелів ґорлицкого повіту

Вчера, 17. листопада/новембра, ґорлицка старостка Мария Ґубала звернула ся до жытелів повіту з апельом розважні ґаздувати водом. Причыном сут некорыстны в остатнім часі атмосферичны обставины звязаны з браком опадів, чого результатом є значуче однижыня рівня ґрунтовой і в менчій мірі глубиновой воды. Староста Ґубала апелює в комунікаті розважні ґаздувати водом і хоснувати єй выключно на социяльно-бытовы потребы та стримати ся з выкорыстуваньом воды, жебы примірно вмыти авто або інче ґратя, підізды до ґаражів ци пляцы.

Систем зимового ознакуваня в Бєщадскым Нацийональным Парку

Бєщадскій Нацийональный Парк поінформувал, што на обшыр Парку вернул специяльный систем зимового ознакуваня. Находит ся він над выжньом границьом ліса в пасмі полонин. Червены кыйкы з номерами дозваляют скоро усталити положыня осіб потрібуючых помочы. Каждый з кыйків має табличку з номером, якій позвалят на скору локализацию GPS і приспішат акцию GOPR-у. На жаль, были припадкы, же туристы нищыли, одкручали і заберали сой табличкы з ознакуваньом. Працівникы Парку апелюют шанувати і не нищыти ознакуваня, бо од него залежыт людскє жытя.