«Слово» – Воведеніє во храм Пресвятой Богородіці – неділя, 9.00 год.

Праздник вoведенія во храм Пресвятой Богородіці бы сьме в Святім Писмі не нашли. Но його історію познаме через традіцію Церькви. Дакотры назнакы находиме в книзі Псалмів. Што нам тот праздник говорить?

Родічі Пресвятой Богородіці Йоакім і Анна были бездітны і барз прягли мати дітинку, і дали обіцянку, коли їм Бог поблагословить дітинку, дадуть єй на служіня Богу. А Господь їм поблагословив дітинку – саму матірь Божого Сына. А коли мала Марія три рокы, родічі выповняючі обіцянку приводжають єй за проводу дів зо свічками до єрусалимского храму. Ту єй приймать прпрок Захарія – отець Йоана Крестителя. Бере єй за ручку і воваджать до Сватая Святых – то є до найсвятішого місця єрусалимского храму. Там находив ся Ківот завіта. І там не смів нихто заходити, ани священикы, лем сам архієрей, і то раз до рока, а не без кровли.

А Марія вольні перебывать у святилищі, Ангелы приходили і перебывали з Ньов. А подля традіції сам святый Архангел Гавриїл приходив і приношав їй небесный хліб.

Марія вступує до Святая Святых, де быв Ківот, бо она є духовным Ківотом, котрый прийме до свого внутра не табліці Завіту, але само Боже слово, Божого Сына. Она Вступує до храму – бо она є духовный храм. Она приймать хліб од ангела, бо она прийме до свого лона небесный хліб.

Што говорить нам тот праздник про нас? Же і мы сьме храмом Жывого Бога. Маме мерьковати на храм нашой безсмертной душы, жебы быв все достойный приймати до нього Боже Слово як слово і в святім причастю. Тыж указує нам потребу молитвы за добре і ревне покликаня до монашеского і священицкого ставу. Говорить ку родічам – мольте ся за покликаня про своїх дітей. Коли родічі оддадуть дітину на служіня Богу, тым не тратять дітину. Але праві наопак – здобывають. Бо та дітина буде молити ся за них, за їх спасіня, і Господь постарать ся і дасть велике благословіня тым родинам, одкы выйдуть монашы і священицькы покликаня.

Просьме Пресвяту Богородіцю, най выпрошать нашым родічам силу до такой жертвы і молодым сердцям одкрытость на Боже покликаня. Жебы так, як Марія з готовностьов одповісти: Най буде твоя воля. Слава Ісусу Хрісту!

В неділю, 4. децембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. децембра 2022 р. о 12.00 год. і 5. децембра 2022 р. о 2.00 год. за русиньскым часом.