Сумар дня на 24. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2023 р.

Молитвы о мир і выстава о гуманітарній помочы грекокатоликів в Пряшові

Днес єст рівно рік од початку воєнной інвазиі росийской арміі на Украіну. Смутну річницю припоминают і грекокатолицкы вірны в Пряшові. Владыка Петро Руснак, апостольскій адміністратор Пряшівской Архієпархіі, позвал в тот ден ґу постови і молитві за покій і мир на Украіні. Днес в катедральным соборі св. Йоана Крестителя в Пряшові правит ся прото молебен та панахіда за вшыткы жертвы войны. В рамках подіі одбуде ся і одкрытя выставы фотоґрафій, котры вкажут реальніст войны, біженьской кризы і помочы зреализуваной грекокатолицкыма вірныма. Выстава має быти єдночасно посиліньом про рішыня люди дальше помагати потерпілым од войны. Духовне покровительство над выставом перевзял владыка Петро Руснак вєдно з председом Пряшівского Самосправного Краю Міляном Маєрскым.

О мир на Украіні молят ся і в православных церквах на Лемковині

О мир на Украіні будут ся молити і православны вірны на Лемковині. Писмом з 16. лютого/фебруара архієпископ Паісий возвал духовенство перемышльско-ґорлицкой єпархіі і вшыткых вірных до дальшой сильной молитвы о мир на Украіні. Владыка попросил, жебы в церквах (де є така можливіст) был днес одслуженый молебен співаный в часі борбы з ворогами. Там, де неє можливости одслужыти молебня, владыка наказал вознести молитвы о перемогу над росийскым аґресором в неділі 19. і 26. лютого/фебруара. Архієпископ просил, жебы в часі богослужынь однести ся в проповіди до траґічной росийской напасти на Украіну. Подякувал духовенству і православным вірным за духову і материяльну поміч для Украіны.

Вышло нове чысло «Бесіды»

Вышол першый тогорічный номер часопису Стоваришыня Лемків «Бесіда» ч.1 (190) за місяці січен/лютый. Інформує головно о подіях в нашым світі, што проходили в остатніх місяцях 2022 рока. Чытати мож м.ін. статі Лешка Шаруґы про одроджыня лемківской культуры, Северияна Косовского про кєрмеш в православній парохіі в Михалові і Ден Русинів Польщы, Андрия Ковальскочо про XV Стрічы Трьох Поколінь з Лемківском Культуром та дописы Петра Трохановского споминаючы на жытя Юрия Новосільского і Григория Пецуха. Як все будут і выімкы з інчых ґазет – польско- і словацкоязычных дописів, разом з коментарями редактора часопису. Двомісячник є доступный в локальных Кружках Стоваришыня Лемків в Польщы, мож го почытати і в бібліотеці Руской Бурсы в Ґорлицях. Найновшый, а і архівальны чысла годны сте придбати в електронній версиі на сайті Стоваришыня Лемків.

Пущаня для діти в Рускій Бурсі

Уж заран, 25. лютого/фебруара в просторах Руской Бурсы в Ґорлицях пройде пущаня для діти. Буде музика, світла, забавы і конкурсы для наймолодшых. Серед тых забав напевно будут такы, якы знали нашы дідове, а не бракне і тых сучасных, котры знаны сут нашым дітям. Заплянували сме забавы і конкурсы при музиці, з музиком, а моментами і без. Сходити буде мож ся на 16.00 год. Вступне на пущаня для діти дармо, а на столах буде тото, што каждый принесе. Красні просиме – не лем наймолодшых, але і іх родичів! Деталі чытайте на нашым портали.