Близко 9,4 млн зл на ремонт памятників на обшыри підкарпатского воєвідства

Воєвідскій Консерватор Памятників Підкарпатского Воєвідства подал до публичной інформациі список дотаций признаных на 2023 рік на сфінансуваня ремонтово-консерваторскых робіт при памятниках, што находят ся на обшыри того воєвідства і вписаны сут до державного реґістру памятників.

До кінця листопада/новембра минулого рока до уряду вплынуло 349 внесків о признаня дотаций на фінансуваня ремонтово-консерваторксых робіт, з чого признали на 214 внесків. Фінансуваня выносит разом 9 млн 392 тис. зл.

Признали 122 дотациі на ремонтово-консерваторскы роботы при обєктах архітектуры (нерухомы памятникы) на квоту 5 млн 730 тис. зл, та 92 дотациі на консерваторскы роботы при рухомых обєктах (напр. творы плястичных штук, ентоґрафічны обєкты, бібліотечны материялы, нумізматы ітп.) на квоту 3 млн 662 тис. зл.

Кєд іде о лемківску культурову материяльну спадковину, то поведе ся зреализувати слідуюче:

• ремонтовы роботы даху і шалюнку стін олтаря в православній церкви в Перегримці;
• консерваторско-ремонтовы роботы при даху прицерковной дзвінниці в Радошыцях;
• провести другій етап ремонтово-консерваторксых робіт (ремонт даху, елевациі), зробити одгромову інсталяцию, ремонт електричной інсталяциі при бывшій грекокатолицкій церкви Рождества Пресвятой Богородиці в Завадці Рыманівскій;
• одкрывковы баданя при поліхроміі і забезпечаючы роботы при іконостасі в бывшій грекокатолицкій церкви св. Михала Архангела в Смільнику;
• консервацию жертвенника і запрестольного олтаря в православній церкви Успінія Пресвятой Богородиці в Щавным;
• полну консервацию ікон Божой Матери і феретрону в бывшій грекокатолицкій церкви св. Михала Архангела в Святківці;
• полну консервацию іконостасу в православній церкви св. Михала Архангела в Туряньску.

Не повело ся натоміст отримати фінансуваня на продолжыня консерваторскых робіт при поліхроміі в грекокатолицкій церкви в Репеди, ани на консерваторскы баданя іконостасу в православній церкви Успінія Пресвятой Богородиці в Щавным.