«Новосільскій. В сотну річницю народин»

Од заране в Нацийональным Музею в Кракові презентувана буде выстава «Новосільскій. В сотну річницю народин». Выстава представляла буде три темы в творчости Юрия Новосільского: пейзаж, тіло і абстракцию. Буде мож обзерати містецкы і сельскы краєвиды, представлены з ріжных перспектив; тіло, што на образах артисты стає ся праві ґеометричном формом, та абстракцию, што односит ся до найвысшого быту, выабстрагуваного з земской реальности.

Юрий Новосільскій свою артистичну подорож зачал в 1940 році, студиюючы в окупацийній Staatliche Kunstgewerbeschule в Кракові. По войні в роках 1945-1947 продолжал науку в краківскій Академіі Красных Штук в проф. Євгена Ейбіша. Диплом здобыл в 1961 році в Державній Высшій Школі Плястичных Штук в Лодзи. В 1957 році остал членом-основательом реактивуваной по войні ІІ Краківской Ґрупы. Был выкладовцьом в Высшій Школі Плястичных Штук в Лодзи, а в 1962 році звязал ся з Академійом Красных Штук в Кракові.

Пейзаж, тіло, абстракция

Нацийональный Музей в Кракові може похвалити ся знаменитом колекцийом робіт Новосільского, в тым малярскых, на папері та іконом, котра презентувана є в Палаци Біскупа Еразма Цьолка в просторах посвяченых церковній штуці. Образы артисты мож обзерати тіж в постійній Ґалериі Польской Штукы ХХ і ХХІ ст. в Головным Будинку.

«Выстава, зрыхтувана з нагоды сотной річниці народин Новосільского, представлят три темы в його творчости: пейзаж, тіло і абстракцию. Пейзажы Мастера приводят на думку фільмовы кадры, а іх композиция в значній мірі операт ся на зоставліню пласкых і ґеометричных форм» – чытаме в аднотациі експозициі.

В презентуваным выборі робіт буде мож обзерати містецкы і сельскы краєвиды, представлены з ріжных перспектив – часами фронтальні, сут і кадры згоры, як і з лету птаха.
«Друга тема то тіло, котре єднак не буде обєктом естетичной контемпляциі, але явит ся гейбы ґеометричном формом, позбавленом тілесности – єст упрощене, зритмізуване і анонімове. Артиста, глубоко зануреный в духовости, стремил до того, жебы вказати освячене тіло, выабстрагуване з земской реальности» – пише ся дальше в запрошыню до выставы.

Третя тема выставы – абстракция, в творчости Новосільского односит ся головні до найважнійшого быту, до трансценденциі, котрой еманацию становит світло, а тіж світло знаня і освічыня.

Опроваджаня по выставі

Вернісаж выставы пройде 14. квітня/апріля, на кураторскє опроваджаня музей просит на 25. квітня/апріля. Выставу мож видіти до 15. жолтня/октобра тр.

Кураторком выставы є Анна Будзалек – історичка штукы, кураторка модерной штукы, кустошка в Одділіню Сучаной Штукы Нацийонального Музею в Кракові. Наштоден занимат ся польском штуком по 1945 році з особливым увзглядніньом творчости жен в польскым артистичным жытю та діяльности І і ІІ Краківской Ґрупы.

Фот. mnk.pl