«70%» – З Рыхвалду до Свіржа, ч. 4 – неділя, 18.00 год.

На фото видите єден з найціннійшых експонатів з колекциі Львівского Нацийонального Музею ім. А. Шептицкого. В музейній колекциі єст барз вельо ікон з тым сюжетом – Покров Пресвятой Богородиці.

Чом же тот образ такій цінный? Передовшыткым, він і гардый, і цікавый, але цінный і тым, же дост давный – датуют го кінцьом XV ци початком XVI столітя. То ікона з села Рыхвалд (Овчары). Мі выглядат так, же то міг быти запрестольный образ, ци намістный – бо і днес в тyм селі єст прекрасна церков Покровы Богородиці.

Тото фото подаєме ту просто так, лем жебы помилувати ся, бо в днешній передачы не бесідуєме о іконах. Радиме лем о селі Рыхвалд – власні так до днес называют Овчары мешканці села, іх діти і внукы. Аж і найстаршы не застали той іконы Покровы в своім храмі – она была оддана до музею іщы скорше. А што они взагалі застали, што памятают? Тото почуєте в днешній передачы…