«Слово» – 12-та неділя по Сошествії Святого Духа – неділя, 9.00 год.

Чоловік дістав уж на12nedila початку дар слободной волі. Но слободна воля несе зо собов і рішіня. Так як кідь дахто іде по дорозії приходить ку роспутю і мусить рішати ся, де хоче іти далше. Не може іти по двох дорогах. Мусить выбрати собі єдну. Так і в духовнім жывоті.

І днешнє слово нам говорить як молодый чоловік пришов за Ісусом з конкретным а барз важным вопросом: Учітелю добрый, што доброго мам робити, жебы єм набыв вічный жывот? Тот вопрос быв важный, фундаменталный, Тот чоловік не пришов за Ісусом облесно, з планым наміріньом, жебы Йохо поїмати на словах, як то робили дакотры і Ісус їм явно повів: Чом ня покушате?

Тот чоловік пришов щіро. Прото Ісус йому давать одповідь. Кедь хочеш войти до жывота, сохраняй заповіди – не убий, не чуджолож, не крадь, оддай честь отцьови і матери. Коли тот чоловік тото чув,повів: тадь тото я так роблю од маленкости. Та што іщі? А чекав, же Ісус му дасть даяку легку заповідь, яку він без пролемів звладне. Та Ісус повів: Кедь хочеш быти дконалый, ідь продай што маш, роздай бідным, так прийдь а наслідуй мене і будеш мати богатство в небі. Но він одышов смутный. Бо мав великый маєток.

Тот чоловік просив од Ісуса, котров дорогов мать іти а Ісус йому одповів. Але він не прияв тоту пораду. Ісус видів, же на його дорозі є богатство, котре йому сперать іти ку небу. Прото йому говорить: ослободь ся, одвяж ся од привязаня. І не зробив тото рішіня. Ісус не силовав, але лем повів: кедь хочеш…

І мы находиме ся перед такыма рішінями в нашім жывоті каждый день. Кому увіриме? Увіриме Хрістови або току світу? Тот світ нам нукать то, што є приємне, приваблаве, што не вымагать од нас одріканя жертвы. Коли чує о Божым слові, о заповідях, тогды реаґує: тото уж не плятить, тото уж не слухайте, як бы повіли, тото вымажте з Божого слова…. А Ісус нам говорить, што тот світ не хоче чути.

А на нас є, котров дорогов ся выбереме. Ці дорогов того богатого, котрый не прияв тоту Божу пораду, хотів іти дорогов бохатства, славы, курточасной роскоші – іншыма словами повіджене: Іти дорогов погыбелі. Або рішиме ся увірити Ісусови, котрый повів: Я єм дорога, правда і жывот і Я єм світло про світ…. хоць то много раз не буде легко, але выбереме собі дорогу жывота. Слава Ісусу Хрісту!

В неділю, 27. авґуста 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. авґуста 2023 р. о 12.00 год. і 28. авґуста 2023 р. о 2.00 год. за русиньскым часом.