З каштеля в Зборові буде музей

Каштель Шередія із 16-го столітя в Зборові, Бардейовского окресу, перешов почас попереднього року і пів компллетнов реконштрукційов.

Выновленый ренесанчный каштель в центрі села буде служыти як музей, а так само на културны події. Подля старосты села Яна Шуркалы обєкт рокы служыв Маковіцькому панству як резіденчный а пізніше адміністратівный центер.

Музей і културный обєкт

„Пізніше ту были штатны лісы. Были ту і служобны квартелі про лісных робітників. У 1969-ім році обєкт выгорів і одвтогды властно упадав. Од 2014-го року, кедь сьме дістали каштель до маєтку, подарило ся нам го поступно реконштруовати. Реконштрукція завершыла ся в тім році, кедь сьме з европскых фондів в рамках черезгранічной співпраці Interreg V-A Польща-Словакія 2014 – 2020 здобыли і проінвестовали майже міліон евр,“ повів про аґентуру TASR Шуркала.

В спідній части каштеля буде векша сала з кухньов, як і вступна містность про турістів. „На першім штоці буде музейна експозіція. В підкровю, шпеціфічный просторах, буде ґалерійный простор. Цілый обєкт буде схоснованый, окрім пивніці, котру сьме теперь в рамках реконштруцкії не рішыли, але плануєме до будучности,“ інформовав староста Зборова.

Першу сезону зачнуть в слідуючім році

Село на фінанцованю реконштрукції каштеля брало участь пятьома процентами. Вєдно з далшыма інвестіціями то подля старосты є проблизно 100 000 евр. Каштель реконштруовали поступно, у 2017-ім році была зроблена стріха.

Сучасна реконштрукція была реалізована в рамках черегранічного проєкту Забыта країна Лемків і Руснаків у співраці із селом Кружльов і Ґмінов Устя Ґорлицьке.

„Ідея є така, же ся поставлять три експозіції єдного музея, котрый буде черезгранічно служыти про турістів із Словакії, Польщі і, самособов, про чуджінців,“ повів Шуркала і доповнив, же в каштелю будуть выставльовати і выкопаны предметы із Зборовского замку.

„Буде презентована і історія той будовы в рамак родів, котры ту діяли. Буде ту народописна експозіція, заміряна на підданство, котре ту жыло. В послідній части буде експозіція заміряна на то, з чого жыли люди в тім краю. В нашім припаді то переважно лісницьтво, роботы з деревом, склярьство і так далше.“

В каштелю теперь зарядять інтерьєр і плануть го отворити кінцьом року. Першу сезону про навщівників спустять правдоподобно в маю слідуючого року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА