59 річы о Ендім Варголи, котрых не знаш, але ся дознаш

1. Енді Варголь вродил ся як третій сын Андрия і Юлиі Варголів. Вродил ся 6. серпня 1928 рока.
2. Был выедукуваным артистом – скінчыл Технолоґічний Інститут Карнегі зо званьом ґрафіка.
3. Специяльністю на початку його карєры были ілюстрациі черевіків, якы вказували ся в маґазині „Glamour”.
4. В 1949 році при першій публикациі вв. черевіків при підписах, правдоподібні през описку, страчено в його назвиску букву „о” – од тамтого часу Варголь зачал ся так власні підписувати.
5. В. серпни 1951 рока єден з його рысунків был опуликуваний в ґазеті „New York Times”.
6. За тот рысунок признано му золотий медаль Art Director’s Club.
7. В червци 1952 рока отворил свою першу выставу.
8. Был ілюстратором книжок в початках свойой карєры. Книжочкы тоты не продавали ся за добрі.
9. В 1955 році достал великє замовліня на серию рысунків черевіків до недільного „New York Times”. Отримал за тото вынагороджыня 100.000 $.
10. Проєктувал выставовы выгляды, м.ін. для Тіффанього.
11. З часом, як уж го было стати, зачал купувати діла штукы.
12. Посеред першых закупленых річы были образы Пабля Пікассо.
13. Як типовий Русин, нич не вымітувал. Лем докупувал нове і нове… а коли была промоция – купувал гуртово.
14. По смерти авкция його річы тырвала 9 дни.
15. В 1959 році напечатал кухарску книжку „Дыкы малины”.
16. Варголь жаждал славы. За 50 $ Мурєль Лятов підповіла му, што повинен малювати – тото што любит найбарже.
17. Што зачал малювати? Грошы і пушкы зупы Campbell’s, як його улюбленой – през 20 років штоденні іл таку зупу і пачку кракерсів.

18. В своіх творах Варголь звертал увагу на повторіня і конформізм сучасного жытя, было то оддзеркаліньом масовой культуры.
19. Дополніньом думкы кількіст і повторіня была нова продукцийна метода образів, яку зачал хоснувати – гадвабоґрафію (анґ. silkscreen).
20. В 1962 році зорґанізувал першу поважну індивідуальну выставу – 32 образы зуп Campbell’s.
21. В дни закінчыня выставы самовбийство почынила Мерилін Монров і так, Енді зачал творити серию єй гадвабоґрафічных образів, якы принесли му найбільшу славу.

22. Варголь намалювал свою версию ціненого през світ образу Мона Ліза Леонардо Да Вінчі.
23. Велику част його творів занимают образы представляючы смерт і катастрофы. Варголь хотіл в тот спосіб звернути увагу на нашу обонятніст для смерти незнаных нам осіб.
24. Коли куратор Варголя рішыл, же артиста намалювал уж за вельо песимістычных образів, порадил му зачати малювати квітя.
25. Продал вшыткы образы представляючы квітя.

26. Коли бракувало му новых інспіраций, звідувал ся каждого, што повинен тепер малювати.
27. Єден зо знаємых попросил го о коровы. Варгольови барз ся тото сподабало.
28. Для вказаня абсурду традицийного розумліня штукы през культуру заходу, зробил образ худобы в формі тапеты – шак і так великы діла штукы хоснує ся лем як декорацию на стіну…
29. Был різбярьом – раз зробил інсталяцию з картонів, другій раз з бальонів выполненых гельом.
30. Занимал ся тіж інчыма формами культурового преказу.
31. Спілпрацувал з ансамбльом Velvet Undergound.
32. Сотворил фільм Chelsea Girls, якій был комерцийным успіхом.
33. В 1967 році Варголь зробил серию автопортретів.
34. Уж товды стал ся іконом культуры. Автопортреты находили ся серед найчастійше публикуваных.
35. В тым самым році, 1967, одкрыл, якы можливости, творчы і комерцийны, несе друкуваня великой кількости ґрафік.
36. Перше робил єдноразовы копіі. Тепер зробил на папері пакєт десятьох гадвабоґрафічных портретів Мерилін Монров в выданю двіста пятдесятьох досъє десятьох ґрафік.
37. Досъє ішли як вода, дораблял новы і новы.
38. Творил, мешкал в ательє Фабрика.
39. Был 3-кратні пострілений в 1968 році през хвору на розум акторку.
40. Престал малювати, занял ся фільмом.
41. Найбільшым успіхом был фільм Trash.
42. Основал фільмовий маґазин „Andy Warhol’s Interwiew”.

43. На зиму 1971-72 вернул до плястычных штук – зробил 2000 образів комуністычного лідера Хін – Мао.
44. Бывал в дискотеці Studio 54, презначоной для ліпшых новойорчыків.
45. Знаємил ся з Бобом Диляном, Міком Джаґером ци Джоном Леноном.
46. Бывал в Білым Домі.

47. Знаємил ся з королями і диктаторами.
48. З комерцийного артисты хотіл стати ся бізнесовым артистом.
49. За 25 000$ робил на замовліня портреты славных люди.
50. Писал. Без успіхів.
51. Кіньцом фільмовой карєры был фільм Bad.
52. Деякы образы малюваны были в неконвенцийональний спосіб – полотно малювано мідяном фарбом, на іщы мокру фарбу сикали колеґы Варголя, заходила хемічна реакция і так творил ся образ.
53. Варголь основал свій канал в телевізиі Andy Warhol’s TV.
54. Вельо іздил по світі.
55. По роках планнійшого малюваня до формы вернул в 1986 році з образами Тайной вечері.
56. Більша част маєтку Варголя, шацувана на 75-100 милийонів долярів, дала початок благодійній орґанізациі о назві Фундация Плястычных Штук Енді Варголя. То єдна з найбогатшых того рода орґанізаций в Зъєднаных Штатах Америкы.
57. В 2013 році образ Варголя Silver Car Crash (Double Disaster) осягнул рекордову ціну 105.400.000 $.
58. По Pittsburg’s Warhol Museum найбліьше чысло творів Варголя находит ся в Музею Модерного Мистецтва Енди Варголя в Лабірци (Medzilaborce).
59. Енді Варголь вмер 22. лютого 1987 рока, маючы 59. років.

фот. wikipedia.org, текст на основі книжкы Warhol 1928-1987, Варшава 2006