Рутенія іде на турне. Хырбетом ку горам є русиньска історія 20-го столітя

В юні минувшого року Фолклорный ансамбель Рутенія, котрый діє в столиці Словакії – Братіславі, одпремєровав своє найновіше танечно-драматічне представліня, яке дістало назву іншпіровану книжков Павла Роберта Маґочія – Хырбетом ку горам.

Рутенія втогды премєров одсвятковала, з дворічным опізніньом з причіны пандемії, свій десятый юбілей існованя. Теперь ансамбель рихтує ся на турне, в рамках котрого тоту інсенацію одограть в штирьох містах на выході Словакії.

Бескид як сімбол русиньской долі

Турбулентне 20-те столітя значно овпливнило і долю Русинів. Выселенецьтво за океан, Перша світова война, політічна і народна еманціпація, приєднаня до складу Чехословакії, несповнена автономія, але і Друга світова война, анексія Підкарпатьской Руси Совітьскым союзом, вычеркнутя Русинів з мапы світа, третє народне возроджіня.

То лем маленька частка з того, што Русины у 20-ім столітю пережыли. Творці представліня заміряли на першу половину 20-го столітя, котра была про Русинів фундаментална.

Інсценаційов Хырбетом ку горам проводить Николай Бескид, ґрекокатолицькый священик, русиньскый діятель і родолюб, єден із многых вызначных особностей того роду. Николай став свойов властнов жывотнов історійов якбы стілесніньом історії і долі русиньского народа.

Народив ся на теріторії днешнього Мадярьска, не стратив свою ідентічность, вернув до карпатьскых гір, підпорив взник Чехословакії, пише, творить, робить про народ а вмерать в часі, коли на веце як 40 років „вмерать“ в країнах совітьского блоку і русиньскый народ.

Інсценація лем частково выходить із історічных реалій, веце простору дістала вольна іншпірація жывотом Николая Бескида, чім хотіли творцьове оддати честь нелем Николайови, але цілому роду Бескидовых.

Шырока Карпатьска Русь

В танечных частях ся Рутенія заміряла на фоклор з русиньскых реґіонів северовыходной Словакії, але і з реґіонів Підкарпатьской Руси, днешньой Закарпатьской области Україны.

Так властно ансамбель презентує богатство і розмаїтость русиньского фолклору з шырокой теріторії Карпатьской Руси, теріторії історічно населеной Русинами, з реґіонів, котры в меджівойновім періоді творили теріторію Чехословакії.

Одказ є ясный. І кедь ся граніці і державы почас минувшого столітя дакілько раз мінили, Русины зістали доднесь єдным неділительным народом, і їх културне богатство є сполочным русиньскым богатством.

Штири міста і велика продукція

Окрім Фолклорного ансамблю Рутенія в предсатавліню грає русиньскый актор Володимір Чема, котрый має роль Николая Бескида. На сцені буде мож видіти і Народну музику Рутенія, значіть, властну капелу ансамблю, а Дітячій фолклорный колектів Рутенячік. Мож сміло повісти, же Рутенія іде на турне „у великім“, і на професіоналній уровни.

Представліня Хырбетом ку горам буде мож видіти в місяці новембер в Снині і Пряшові, а в місяці децембер у Свіднику і Старій Любовні. Листкы на окремы выступліня мож купити онлайн. Веце інформацій на плаґаті і сайті ансамблю.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА