Вмер проф. Владислав Міодунка. На антені ЛЕМ.фм бесідувал, чом треба ся вчыти лемківского языка

Дня 24. квітня/апріля тр. вмер проф. Владислав Міодунка, подало на своім профіли в сіти Facebook Стоваришыня «Брістоль» Польскых і Заграничных Учытелів Польской Культуры і Польского Языка як Чужого.

Проф. Владислав Міодунка (1945-2024) был выдатным языкознавцьом, специялистом ґлоттодидактикы, бадачом польско-чужого білінґвізму, автором вельох ціненых науковых публикаций, з котрых вельо має піонерскій характер.

Проф. Владислав Міодунка был абсольвентом Ягайлоньского Університету і наукову карєру продолжал як раз на alma mater. Ступін доктора гуманістичных наук отримал в 1973 році, шіст років пізнійше зробил габілітацию, а од 1991 рока был угоноруваный званьом професора.

Основал Заклад Стосуваного Языкознавства, был серед орґанізаторів Катедры Латиньской Америкы в Інституті Реґіональных Студий Ягайлоньского Університету, довюл до основаня Державной Комісиі Посвідчаня Знаня Польского Языка як Чужого, был єй першым ведучым.

Полнил ріжны функциі, м.ін. был продеканом Выділу Медженародных і Політичных Студий Ягайлоньского Університету, проректором той учельні до справ кадровой і фінансовой політикы.
Был м.ін. членом президиі Польской Академіі Наук, робил в Комітеті Бадань над Міґрациями Люди і Полонійом. Кєрувал Центром Языка і Польской Культуры на Світі.

Выкладал на вельох заграничных університетах.

Перед десятьома роками редактор Богдан Ґамбаль запросил проф. Міодунку до студия радия ЛЕМ.фм, жебы звідати го – чом треба нам ся вчыти лемківского языка? Кого вчыти? Як вчыти? По што вчыти? Де вчыти? Хто повинен вчыти, а хто ні?

«Проф. Міодунка буде радил людям малой віры і малых знань о своім, што думат про вчыня лемківского языка» – написал перед десятьома роками в заповіди премєры бесіды наш редакцийный колеґа.

Одповід на тоты вшыткы звіданя найдете в архівальным проґрамі з циклю «Пропаґанда». Бесіда з проф. Міодунком буде трансмітувана заран, 25. квітня/апріля тр., о год. 10.30, пак повториме єй в о год. 21.30.