«Слово» – Неділя сліпого – неділя, 9.00 год.

Радостный час Пасхы ся приближыв ку свойому закончіню. Днешня неділя, звана і сліпородженого є послідньов недільов Пасхалного часу. В тоту неділю нам свята Церьков ставить перед нас подію, коли Ісус, выходячі з храму, стрітив сліпородженого чоловіка, котрый находив ся близко храму і жобрав.

Ученикы зареаґовали словами: Учітелю, та хто согрішыв, він або його родічі, же народив ся сліпым. Но Ісус їм повів: Не згрішыв ани він, ани його родічі, но мають на ним ся выявити Божы діла. Мать быти Божый Сын прославленый. І такой додав: Я мушу творити діла Того, котрый мене послав, покы є день. Покы я на світі, я світло світа.

І зробив болото, омыв йому очі і послав омыти я в сілоамскій купальні. І він вернув ся видячім. Тот сліпый провидів нелем своїма тілесныма очами. За што дякує і одкликує ся на свого Выздравителя. Але він провидів і духовно. Коли є приведженый перед раду, сміло говорить перед нима і обранює Хріста. Ці є грішный не знам, але єдно знам, я быв сліпый, і теперь виджу.

Жыде його выгнали зо свого общества. Ісус його нашов і ся звідує: Віриш в Божого сына? А він ся опросив, а хто то є? А Ісус, ты го видів, ты го видів очами свойой душі, коли тіло находило ся в темноті, но душа была уж у світлі познаня Хріста. А так на нім ся выповнили Хрістовы слова: Мають ся на нім выявити Божы діла.

То є діло спасіня. Бо тото діло Ісус мусить робити. Чоловік робить своє діло. Тоты, што ненавиділи Хріста- робили діла злобы, нелюбви, убивства, завистливости а далшы. Хрістос робить діла спасіня, одпущіня, милосердя. Но додав – покы є день. То є, покы є час нашого земного жывота.

Так нас тото слово позывать – перебывати у світлі. Не давати ся до темноты. То робиме тогды, коли даваме простор страстям і гріху. І темнота вступує до нашой душы і нашого жывота. Но Ісус напоминать – покы є день. То є, скоро утікайме тогды ку духовному Сілоаму – Хрістови в Тайні покаяна, жебы прияти одпущіня іщі перед наступліньом ночі, то є, нашов смертьов. Бо коли нас в шасі темноты душы в гріху застане момент смерти, тогды тота темнота ся простягне на цілу вічность. Хрістос воскрес!

В неділю, 9. юна 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. юна 2024 р. о 12.00 год. і 3. юна 2024 р. о 2.00 год. за русиньскым часом.