Сумар дня на 4. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 4. вересня/септембра 2024 р.

30 років Карпаторусиньского Общества

Як поінформувало на своім офіцийным сайті Карпаторусиньскє Общество (Carpato-Rusyn Society), котре діє в Зъєднаных  Штатах Америкы, в днях од 25. до 27. жолтня/октобра тр. орґанізация буде святкувала 30 років од свого основаня. Вікендовый проґрам святкувань буде проходил в Народным Карпаторусиньскым Культурным і Освітовым Центрі в Мунгалль, в Пенсильваніі. До святкувань запрошено тіж і Карпаторусиньскій Дослідничый Центр в ЗША та Фундацию Джона і Гелены Тімо. Подія зачне ся в пятницю од выставы творів карпаторусиньского артисты Антония Кубека, разом з прелекцийом «Перед Варгольом: Жывот і творчіст Антония Кубека». В другій ден на участників акциі ждал буде автобус, котрым достанут ся до хыжы Варголя в Пітсбурґу, грекокатолицкого храму св. Йоана Крестителя в Пітсбуґу ци православного храму св. Михаіла в Ранкіні. Субота закінчыт ся ювілейным банкєтом. В неділю одбуде ся 42. річник Карпаторусиньскых Святкувань, котры пройдут в грекокатолицкым храмі св. Йоана Крестителя в Юніонтавн.

Сут штырі пропозициі новых резерватів в малопольскым воєвідстві

Надлісництва з малопольского воєвідства зложыли штырі внескы о покликаня новых резерватів в рамках ініциятивы «100 резерватів на 100 років Державных Лісів». Три з представленых резерватів находят ся в ґорлицкым повіті, сут то резерват «Козє Ребро», «Марковец-Ґрудек» і «Гора Хелм», остатня пропозиция то «Тисы в Выскітній» в новосандецкым повіті. За покликаня новых резерватів одповідают Реґіональны Дирекциі Охороны Середовиска. Як подал представник краківского одділіня, на тоту хвилю тырвают працы звязаны зо зрыхтуваньом проєктів вытипуваных резерватів. Додатково Реґіональна Дирекция Охороны Середовиска просит до участи в консультациях, де мож выразити свою думку на тему пропонуваных обшыи охороны природы. На сайті Дирекциі находит ся список плянуваных резерватів, разом з іх локализацийом та табеля з увагами, котру мож побрати і дополнену одослати. Своі опініі мож переслати до 8. вересня/септембра тр.

Кривулькы з околиц Команчы вписаны на Державный Список Нематерияльной Культуровой Спадковины

На Державным Списку Нематерияльной Культуровой Спадковины нашло ся наступных шіст вписів. Листа творена од 2013 рока містит уж 103 вписы документуючы жывы традициі, звыкы і знаня передаване з поколіня на поколіня. Серед новодописаных традиций нашли ся тіж і кривулькы з околиц Команчы. Оздобна біжутерия плетена была зо шкляных пацюрків. Команецка кривулька має шырокіст од 15. до 20. цм. і выріжнят ся стислі окрисленом будовом. Орнаменты як і барвы кривульок навязуют до мотивів лемківского гафту. Окрем кривульок з Комначы на списку нашли ся тіж традиция рыхтуваня святочных прикрас з оплатка в Долині Ливца, традиция квестуваня на Цмонтері Стары Повонзкы, Собіткы в Ястарни, традицийне малярство Залипя і Домбровского Повісля та культуровы традициі Газів/Хазів.

Европейскы Дни Спадковины в Саноку

Музей Народного Будівництва в Саноку просит в першый вікенд вересня/септембра до участи в Европейскых Днях Спадковины. Подія пройде в неділю 8. вересня/септембра і зачне ся од выкладу др. Губерта Оссадника «Волохы- номады Карпат». В пляні находит ся тіж прерзентация робліня сыра, варштаты зілярства ци показ гры на тромбіті. На конец подіі буде звиджаня з провідником бойківского і лемківского сектора музею.

фот. Gmina Komańcza