Проґрам Театру Александра Духновіча на місяць марец 2015

4. 3. 2015

Медвідь, Спросины

(Мала сцена, 19.00 год.)

Дві єдноактовкы од Чехова – Медвідь і Спросины. Тоты пєсы ся часто уваджають як части єдного представліня. Звязує їх сполочна тема одношіня мужа і жены, котре ся формує  через здолаваня баналных і безсмыселных барьєр і котре наконець завершыть ся взаємнов сімпатійов. Далшым сполочным меновательом тотых двох пєс є сміх, сміх од зачатку аж до кінця, котрый тоты дві представліня проводить веце як сторіча по сценах професіональных і аматерьскых театрів на цілім світі.

11. 3. 2015

„Шахрайки“ (пєса є в україньскім языку)

(Велика сцена, 19.00 год.)

Пінязі владнуть світу… Здобыти ся дадуть нелем досправдовов роботов, але і участьов в різных конкурзах ці „reality show“. О єднім із такых способів вырішають і дві молоды україньскы дівкы. Тоты реаґують на повідомліня америцькой міліонарькы, котра вырішыла подаровати цілый маєток найсімпатічнішой лесбійской парі бывшого СССР. Сітуація ся комплікує, кідь Америчанка, походжіньом таксамо Українка, прийде на Україну… Пєса „Шахрайки“ сучасной україньской авторкы Наталії Уваров є повна неочекованых переломів, комічных сітуацій і несподіваного кінця.

20. 3. 2015

Пан Кідь бы (премєра)

(Велика сцена, 17.00 год.)

Шалена приповідка о тім, як ся із родічів стануть діти і з їх дітей родічі. І чаровный пан Кідь бы собі про вас приготовив іщі далшы неувірительны кавалчікы. Дякуючі його чарованю ожыють дітячі грачкы, із будика ся стане любый камарат малых дітей, што бы лем спали і Червена чапочка научіть вовка мыти собі зубы. І то лем зачаток!

25. 3. 2015

Гавай

(Велика сцена, 19.00 год.)

Гавай є дебут молодой пряшівской драматічкы Михаелы Закутяньской. Траґікомедія з русиньского села із характерістічнов назвов Гавай – то суть пригоды о гляданю самого себе на періферії Европы і в кругу не цалком тіпічной родины.

Проґрам буде доповненый о выступліня театру в іншых селах і містах.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА