Сумар дня на 11. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 11. жолтня/октобра 2024 р.

ХІІ Бієнале Лемківской/Русиньской Культуры

Заран в Креници зачне ся ХІІ Бієнале Лемківской/Русиньской Культуры. Потырват оно два дни. Суботній проґрам традицийно зачне ся панахідом над гробом Епіфана Дровняка – Никыфора о 12.00 год, а пак зложене буде квітя при Памятнику Никыфора в центрі Крениці. На тот ден заплянуваны сут два концерты – о 15.00 год. пройде одкрытя выстав і першый концерт, в котрым запрезентує ся лемківскій Ансамбль Пісні і Танця «Ластівочка» і гості, а о год. 18.30 буде другій концерт з участю ансамблів з Польщы і заграниці. О 20.00 год. пройде стріча творців в рамках ХХХІІ Лемківской Творчой Осени. В неділю од 9.00 год. буде проходила дискусия на тему стану лемківской/русиньской культуры, а о 15.00 год. одбуде ся третій концерт з участю ансамблів з Польщы і заграниці. Акциі будут проходити в просторах Старого Здройового Дому В Креници.

ХХХІІ Лемківска Творча Осін

Заран при нагоді Бєнале пройде в Креници перша стріча в рамках ХХХІІ Лемківской Творчой Осени. Того рока подія єст посвячена 110. річници страдань Лемків в лаґрі Талергоф. Припоминаме, што другій ден тогорічной Лемківской Творчой Осени буде проходил в присторах Руской Бурсы в Ґорлицях. В рамках подіі одбуде ся вернісаж фотоґрафічной выставы «Материя памяти». Двоіх артистів фотоґрафікы, Ядвіґа Яновска та Хрістофер Мысько, прібуют одповісти на звіданя: ци даст ся затримати штоси, што минуло, як вказати тото, што невидиме, але дає ся одчути, і як вказати давне жытя, коли формальной його верствы неє. Два рокы реченый артистичный дует працувал в долині села Незнайова. Іх выстава порушат тему достоменности, памяти і істориі. Артисты замірили ся зробити коляж памяти, котра минула, хоц привидні єст присутна в історичных записах, списаных фактах і, як подают: «факты сут єднак сухы, не трафляют до головы так, як образ». Вернісаж одбуде ся в неділю 13. жолтня/октобра о 18.00 год.

XVII Стрічы Трьох Поколінь з Лемківском Культуром

О два тыжні, в вікенд 26.-27. жолтня/октобра на Нижнім Шлеску одбудут ся XVII Стрічы Трьох Поколінь з Лемківском Культуром. Орґанізатором єст Стоваришыня Лемків. В рамках подіі одбудут ся два концерты, першый в суботу о 16.00 год. в Пшемківскым Осередку Культуры і другій в неділю о 16.00 год. в Авли Комплексу Шкіл в Польковицях. В концертах выступит Лемківскій Ансамбль Пісні і Танця «Ластівочка» разом з запрошеныма гістми.

OTOP одповіст на звіданя про нацийональны паркы

Загальнопольскє Товариство Охороны Птахів (OTOP) одповіст на звіданя і вантпливости жытелів тыкаючы нацийональных парків. Тоты, котрых інтересує тема фунґуваня нацийональных парків, будучых найвысшом в Польщы формом охороны природы, можут дати своі звіданя, выполняючы онляйновый формуляр зрыхтуваный OTOP. Через дакілько тыжнів орґанізация прирыхтує одповіди і омовит найпопулярнійшы темы підчас специяльного вебінару. Формуляр находит ся на інтернетвым сайті Загальнопольского Товариства Охороны Птахів.