Град Любовня має комплетно зреконштруовану северовыходну стіну

Северовыходна стіна граду Любовня є комплетно зреконштруована і добудована. Про аґентуру TASR то потвердив директор Любовняньского музея Далібор Микулик. Вдяка тому є град компактно запертый, што было і цільом проєкту.

За словами Микулика мурарьскы роботы на граді скінчіли. Стіна є обновлена і добудована, бо дашто ся конзервовало, дашто доповнило, і дашто треба было будовати наново.

„Роботы продовжали і на третім а четвертім дворі, і з цілковой сумы 1,2 міліона евр ся проінвестовало уж 70 процент. Четвертый двір є цілый одводненый і оправленый, іщі ся буде робити інтерьер археолоґічной експозіції і застрішіня воєнськых касарень,“ повів директор Любовняньского музея.

Подарило ся так само зреконштруовати студню. Третій двір, де музейници реалізовали шістьмісячне археолоґічне баданя, є так само одводненый, треба го іщі оправити і зробити внутрішню стіну на касарнях. Цільом окремых кроків є головно одводнити дворы граду. „Вода є найвекшым наприятельом про градны стіны і ставбы,“ повів Микулик.

Почас археолоґічного баданя на дворах граду музейникам окрім студні подарило ся обявити і воєньскы касарні, кухню і тілеса на топліня. На касарнях треба іщі докінчіти стріху, на чім бы ся мало працовати і почас зимных місяців, реконштрукчны роботы бы мали проходити і в інтерьєрі.

Актуално є град і сканзен отвореный каждый тыждень од пятніці до неділі. Од 26-го децембра до 7-го януара буде одкрытый град і сканзен каждый день, причім музей рихтує богатый проґрам як рождественный концерт, рождественну приповідку, столованя шляхтіців ці літурґію на Богоявленіє в деревянім храмі в сканзені.

Фото: FB/Любовняньскый музей.