Сумар дня на 27. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 27. листопада/новембра 2024 р.

«Од крапкы до твору»

В найблизшу неділю 1. грудня/децембра в Мазярскій Загороді в Лоси будут проходити плястичны варштаты «Од крапкы до твору», што тыкати будут декоративного мотиву, якым є крапка в народным облечыню і взірництві. Варштаты будут проходити в рамках реализациі векшого проєкту «Крапкы і крискы. Популяризуваня знаня о декоруваню стін в деревяным реґіональным будівництві», котрого орґанізатором є Польскє Людознавче Товариство. Ідею проєкту є найти істнуючу забудову з мотивами малюваных на стінах крапок, зінвентаризувати тоты місця, а вєдно з музейном кверендом – пояснити етимолоґію і значыня тых прикрашынь. Проєкт обнимат м.ін. тереновы досліджыня і кверенды тыкаючы деревяного будівництва, а тіж варштаты. Приміры крапко-крискового малярства стрічали ся по цілій Лемковині. Дослідникы реализуючы проєкт фурт глядают в терені захованых хыж, котры сут або были прикрашены мотивом крапок, крисок. Кєд дахто хоче поділити ся хоц знимком – прошеный є о контакт: radio@lem.fm.

Выклады проф. Шворца

Здружyня Iнтеліґенциі Русинів Словациі як головный орґанізатор запрашат вшыткых заінтересуваных на выклад професора Петра Шворца під назвом «Русины і Чехословация (рр. 1919–1939)». Выклады одбудут ся в Братиславі і Кошыцях, 10. і 12. грудня/децембра. Лекциі професора Шворца будут получены з презентацийом книжкы «Краіньска границя меджe Словацийом і Підкарпатском Русю (рр. 1919–1939). Публикацию выдало Здружyня Iнтеліґенциі Русинів Словациі в минулым році. Є то дополнене і розшырене выданя наголовка, котрый першый раз вышол в 2003 році. Є то 400-страницьова моноґрафія, котра описує словацко-русиньскы односины в меджевоєнным періоді та іх цілодержавны і медженародны получыня. Проф. Шворц дрібницьово бадат проблематику словацко-русиньской границі – гранциі, котра выникнула аж під конец 1918 рока, скорше оба народы жыли разом на обшыри Мадяр. Публикация є наслідством вельолітніх бадань і кверенд м.ін. в архівах Прагы, Бонн ци Відня.

«Нацийональны, етнічны і языковы меншыны в Польщы на европейскым фоні»

В другым тыжни грудня/децембра в Білымстоку одбуде ся дводньова конференция пн. «Нацийональны, етнічны і языковы меншыны в Польщы на европейскым фоні». Конференция має быти вступом до бесіды о 20-літю уставы о нацийональных і етнічных меншынах та о реґіональным языку з 6. січня/януара 2005 рока. В першый ден выповідати будут ся політикы, творці уставы і експерты, на другій ден заплянуваны сут три панелі з бесідами передставників меншыновой страны Спільной Комісиі Уряду та Нацийональных і Етнічных Меншын о тым, што устава змінила в функцийонуваню меншын. Присутны будут по дві особы за кажду меншыну, окрем лемківской і кашевской – тоты дві соспільности будут мати лем по єдным репрезентанті. Головным орґанізатором конференциі єст Выділ Медженародных Односин Університету в Білымстоку, спілорґанізаторами – Катедра Політичных Системів і Прав Чловека Університету Мариі Кюрі-Склодовской в Люблині і Украіньскє Товариство.

Варштаты святочных прикрасок, Ден Русинів Польщы і Велийна Стріча

Уж в найблизшу суботу 30. листопада/новмебра запрашаме вшыткых заінтересуваных до Руской Бурсы в Ґролцицях на варштаты святочных прикрасок. Будут то послідні того рока варштаты з циклю занять веденых в рамках Творчой Бібліотекы в Рускій Бурсі, што фінансуваны завдякы дотациі Міністра Внутрішніх Справ і Адміністрациі, але не послідня заплянувана на тот рік стріча в Бурсі. 7. грудня/децембра одбуде ся Ден Руснів Польщы – початок о 16.00 год., выступлят: ансамбль Терочка та Петро Трохановскій, а 21. грудня/децембра о 15.00 год. обуде ся передріздвяна стріча з прелекцийом др. Юстины Чонсткы-Клапиты на тему колядуваня серед Гуцулів, получена буде з деґустацийом велийных страв і спільным колядуваньом.