Антоний Крог з Нарогодом Міністра Культуры і Нацийональной Спадковины за роботу для народной культуры

Антоний Крог, выдатный етноґраф, писменник і популяризатор народной культуры остал лавреатом престіжовой Нагороды Міністра Культуры і Нацийональной Спадковины. Тото выріжніня єст выразом узнаня для його вельолітнього вкладу в документуваня, охорону і популяризацию культуровой спадковины Лемків та інчых ґруп в Карпатах.

Єст єдным з найвыдатнійшых в Польщы знавців народной культуры Карпат, головні Лемковины, Татер і Підгаля. Єст автором парудесятьох науковых робіт, а тіж популярнонауковых робіт з обшыри народной культуры і істориі тых реґіонів.

Сердечный приятель Лемків і знавця нашой культуры

Крог посвятил велику част жытя на баданя і промуваня лемківской культуры. Як єден з першых в повоєнній Польщы вюл тереновы баданя на Лемковині. В своій роботі і через свою діяльніст вказувал богатство лемківской культуры, традиций, языка і штукы, так само як інчых марґінализуваных соспільности Карпат.

Єст автором м.ін. книжок «Склеп культурных потреб» ци «За тамтом гором», в котрых в субтельный спосіб лучыт особисты досвідчыня з історично-культурном анализом. В примірі першой з выміненых публикаций є то насвітліня ситуациі на Підтатрю, а в примірі другой – автор оповідат о Лемковині. Підкрислят значыня материяльной і духовой культуры в будуваню достоменности, ділит ся своіма споминами зо стріч і перебываня медже Лемками. За тоту книжку был єй автор ногородженый Історичном Нагородом «Політикы» 2017.

Заінтересуваня Лемковином принесли наслідок в формі великой выставы «Лемкы», яка зорґанізувана была в 1984 році в Ґалериі Давна Синаґоґа в Новым Санчы. Была то переломна выстава, котра вказала не лем давну культуру Лемків, але єй тырваліст і продолжаня. Лемкы доказали, што не піддали ся асиміляциі. На выставі нашли ся м.ін. експонаты з колекциі Музею Лемківской Культуры в Зындрановій ци з колекциі Павла Стефановского. На вернісажы выступил Репрезентацийный Ансамбль Лемків в Польщы «Лемковина».

Через рокы Анотний Крог анґажувал ся в чысленны ініциятивы, жебы привернути памят о траґічній доли Лемків. Завдякы його роботі были зорґанізуваны выставы, культурны подіі, опубликуваны были дописы. Крог єст постійным спілпрацівником найважнійшого в Польщы наукового етноґрафічного часопису «Польска Народна Штука – Контексты». Єст тіж автором великой колекциі знимок, од 60. років ХХ ст. фотоґрафувал можливі дуже вчас тереновых бадань. Тота фотоґрафічна документация має неповторный артистичный характер, але предовшыткым єст етноґрафічным джерелом о великым архівальным значыню.

Нагорода Міністра Культуры і Нацийональной Спадковины

Тогорічна ґаля вручаня нагорід одбыла ся в минулу середу 27. листопада/новембра в краківскым студию телевізиі TVP3. Выріжніня особисто вручала міністра Ганна Врублевска. Нагороды признаны были творцям, аніматорам і людям культуры, якы причыняют ся до розвитку, популяризуваня і охороны культуры і нацийональной спадковины. Антоний Крог достал нагороду в катеґориці Народна Культура.

«Угонорували сме особы, котры лучыт незвыкла пасия, одданя, віра в значыня красы і особливо цінный вклад в нашу культуру. Креуют, хоронят, промуют, діют, жебы культура была доступна, а не зашыта в рамы. Выразы узнаня і найглубшой пошаны передают вшыткым лавреатом і лавреаткам Дорічной Нагороды Міністра Культуры і Нацийональной Спадковины 2024. Быти з вами на сцені то чест» – підсумувала міністра Ганна Врублевска.

Фот. www.radiokrakow.pl