«Слово» – 25-та неділя по Сошествії Святого Духа – неділя, 9.00 год.

Чоловік собі ставить різны вопросы, котры мають одношіня ку земному жывоту. Но найважнішый є вопрос, котрый мать одношіня ку вічности. Як набыти вічность? Як дістати ся до Царьства Небесного?

З такым вопросом приходить і учітель закона, котрого імя не познаме і ся звідує якраз тот вопрос Ісуса. Ісус йому одповідать вопросом: Што написане в законі, як там чіташ? Бо тот законник не пришов з щіростьов, але жебы під вонкашнім добрым вопросом покушав Ісуса, пробовав його поїмати на слові.

Ісус, як Бог знав, што є в сердці того чоловіка, а на його властный хосен і наш кладе йому тот вопрос. А тото законник одповів: Будеш любити Господа Бога… а свого ближнього як самого себе. На што Ісус одповів: Добрі єсь повів. Тото роб і будеш жыти. А він якбы ся хотів оправдати, ся звідує: А хто є мій ближній?

А ту Ісус описує образный приклад о чоловікови, котрый сходив із Єрусалима до Єріхона і пав до рук розбійників, котры го окрали, розблекли і зохабили на пів мертвого. Ани священик, ани левіт, котры переходили тов дорогов, йому не помогли. Але даякый самарян ідучі тов дорогов ся заставив, поміг тому нещасному, взяв до гостинця і старав ся о нього. Коли одходив, дав пінязі господарьови з просьбов, жебы го дозерав, а кедь дасть на нього веце, верне йому, коли ся верне. І так ся Ісус звідує: Хто быв ближній тому, хто пав до рук розбійників. А тот законник одповів: Но тот, котрый быв ку ньому милосердный. А Ісус йому повів: Ідь і ты а роб так само.

Хто є тым самаряном? Є то сам Хрістос. Тоты слова адресує наперед тому законникови, котрый є тым чоловіком, засліпленым діаволом, окрадженый демонами. А так хоць выглядать, же пришов глядати дорогу до жывота, насправды пришов глядати смерть Хріста. А Хрістос тому, котрый хоче йому зло, пришов го покушати а поїмати на слові, проявлять милосердя. Тым чоловіком є каждый із людей.

Хрістос приходить, жебы душу, котра є окраджена і добита демонами, лежача ледво жыва, приходить выздравити. Приводить до гостинця свойой Церькви, звірює єпіскопам і священикам, жебы через проповідь і удільованя святых Тайн старали ся о безсмертны душы.

А тыж нам тото слово говорить, так як нам Господь проявлять милосердя, одпущать нам нашы гріхы, піднимать нас упавшых, жебы і мы сьме проявляли милосердя ку нашым ближнім. Бо і нам адресує тоты слова: Ідь а роб так само. Слава Ісусу Хрісту!

В неділю, 15. децембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. децембра 2024 р. о 12.00 год. і 16. децембра 2024 р. о 2.00 год. за русиньскым часом.