«Слово» – Праздник Рождества – неділя, 9.00 год.

Пережываме праздник Рождества Хрістового. Євангелисты Мафтей і Лука подавають нам події, котры одбыли ся в часі Рождества.

Лука гворить, же в часі Рождества недалеко находили ся пастырі, котры вночі дозерали своє стадо. І Ангел Господа появив ся їм і їм звістує о приході Спасителя. Появило ся велике множество ангелів, котры співають: Слава во вышніх Богу і на землі мір, в людях благоволеніє.

Ангел звістує народжіня Спасителя і проґрам, котрый приношать – жебы в людях была добра воля. Бо од паджіня до гріха пановала в людях зла воля. Воля того, котрому чоловік увірив уж в раю. То є діаволу.

А наслідкы того нам описує Боже слово, в якім ставі было людство в часі Ноя. Земля была зоспута перед Богом. Чоловік став ся земльов, тілом. В їх сердцях пановало зло, нахыльность ку злу, выповнюючі ся так воля злого духа, котрых якбы тріумфовав. Так Господь наводить очіщіня через потопу. Ной увірив Богу, поставив корабель, зробив, як Бог хотів од нього.

По потопі світа, коли Ной приніс жертву, Бог говорить, уж ниґда не буде потопы на землі, бо людьске сердце є нахыльне ку злу од свойой молодости. А коли чітаме історію людства, можеме видіти, же так і стало ся. Знову людство сходячі з того Аррарату по потопі поступно ся прихылює ку злу.

Ту приходить Спаситель, як маленька дітинка, жебы приніс тот проґрам: добру волю, напрямену ку добру, любов, покій. Троє волхвів, котры ідуть до Єрусалима, бо сі думають, же там буде новонародженый Царь, увиділи надзвычайну звізду, запалила ся в їх сердцях любов ку тому Царьови, котрого іщі не знали. Не смотрять на перешкоджіня, котры были на дорозі.

Коли пришли до Єрусалима, і там о ничім не знають, царь Ірод є занепокоєный народжіньом даякого царя. Давать собі їх закликати, а дізнавші ся з пророків, же то у Віфлеємі, посылать їх там, жебы ся докладно повызвідовали на дітинку. Ірод репрезентує тоту злу волю, котра была в людях. Звонка указує ту облесность, інтерес о дітинку, а внутрі в його сердці уж горить поломінь зла, убити конкоруненцію на його трон.

Они ідуть і радостно стрічають новонародженого Царя, а напомянуты не вертати ся назад, по іншій дорозі вернули ся до свойой землі. Не бунтують ся, не говорять, та што то? Мусиме утікати як розбійникы? Они з радостьов вшытко перенесли, бо в їх сердцях собі несли Новонародженого Царя і його проґрам: в человіціх благоволеніє.

Дорогы радіослухачі, Господь позывать і нас! Коли приступуєме ку різной сорты Віфлеємам ці іконам Рождества, котры суть опараждены, прекрасна атмосфера, вшытко фаребно освітлене, но в середині того вшыткого лежыть маленька дітинка, котра ку нам говорить: Приймеш тот проґрам? Проґрам любви, покоя, доброй волі, доброго думаня?

Але то значіть іти уж по іншій дорозі: зохабити дорогу гріха, злобы, злой волі а крачати іншов дорогов – дорогов любви, покоя і доброй волі. Хрістос раждаєт ся!

В неділю, 12. януара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. януара 2025 р. о 12.00 год. і 13. януара 2025 р. о 2.00 год. за русиньскым часом.