Вмер пражскый екзарха Ладислав Гучко

Як інформовав на офіціалнім сайті Апостольского екзархату Ґрекокатолицькой церькви в Чеській републіці протосінкел Василь Сливоцькый, дня 14-го януара 2025-го року вмер у шпыталю „На Франтішку“ в Празі по куртій хвороті владыка Ладислав Гучко, пражскый апостольскый екзарха, тітуларьный єпіскоп орейскый.

Владыка Ладислав народив ся 16-го фебруара 1948-го року в Пряшові, в родині русиньского ґрекокатолицького священика. У 1966-ім році голосив ся на штудії на Кіріло-Методійску римокатолицьку богословску факулту в Братіславі.

В тім часі была Ґрекокатолицька церьков у Чехословакії ілеґална, але і римокатолици мали лем єдну позволену семінарію, а державов обмеджены квоты, кілько богословів можуть прияти. Тоты квоты были глубоко під граніцьов реалных потреб Церькви.

Будучого єпіскопа не прияли, і так пішов штудовати експеріменталну фізіку на Природознавчу факулту Універзіты Павла Йозефа Шафарика в Кошыцях, де у 1972-ім році оборонив дізертацію і здобыв дітул доктора природных наук (RNDr.).

З причіны свого реліґійного пересвідчіня не міг зістати робити на факулті, мусив глядати собі іншу роботу. У 1987-ім році здобыв на Высокій школі баньскій в Остраві тітул кандідата ґеолоґічных наук.

Кедь у 1989-ім році дішло в Чехословакії ку політічным змінам, дакілько місяців робив редактора в ґазеті Katolícke noviny, пак в роках 1990 аж 1991 быв выконным секретарьом Конференції єпіскопів Словакії.

У 1992-ім році быв посланый до Рима на теолоґічны штудії на Папску Латераньску універзіту, котры закінчів у 2000-ім році докторатом. Темов його докторьской роботы были козмолоґічны ідеї у російскых реліґійных мыслителів 19-го і 20-го столітя.

Рукуположіня на священика прияв 30-го марца 1996-го року з рук втогдышнього крижевацького єпархы – кір Славоміра Мікловша. Кедь у 2000-ім році вернув з Рима, зачав учіти доґматічну теолоґію на Теолоґічнім інштітуті в Кошыцях, рік быв і шпіруталом в Священьскій семінарії святого Карола Боромейского в Кошыцях.

Папа римскый Йоан Павел ІІ. Ладислава Гучка 24-го апріля 2003-го року призначів апостольскым екзархом про католиків візантійского обряду в Чеській републіці, а єдночасно тітуларьным єпіскопом орейскым. На посаді вычеряв першого пражского екзарху, владыку Івана Лявинця, котрый вже мав высокый вік.

Єпіскопску хіротонію прияв владыка Ладислав 31-го мая 2003-го року в Празі з рук тепершінього руськокерестурьского єпархы – кір Ґеорґія Джуджара.

В році 2004 на Теолоґічній факулті в Кошыцях габілітовав ся на доцента в области доґматічной теолоґії. В роках 2005 – 2011 быв ґенералный секретарьом Чеськой єпіскопской конференції. В Чеській єпіскопскій конференції быв членом Комісії про віроучіня і Комісії про католицьку выхову.

За інформаціями од родины владыкы Ладисава, похоронны обряды одбудуть ся в Празі, де собі желав быти похованый. Вічная память, владыко!