ТАД одпремєрує монодраму О шкодливости табаку

Скапчаня двох тем – судьб маленького чоловічка і чоловіка, котрый у своїм жывоті страчать вшыткы ілузії, з тым приходить нова пєса в репертоарі Театру Александра Духновіча (ТАД) в Пряшові.

Має назву О шкодливости табаку, і текст є твором Антона Павловіча Чехова. В новій монодрамі буде мож видіти Євґенія Либезнюка. Інсценацію режійно приготовив гостюючій режісер Растіслав Баллек, драматурґію і переклад на русиньскый язык робив Валерій Купка. Нову пєсу театер одпремєрує в пятніцю 17-го януара 2025-го року на Малій сцені.

Радо смотриме на чудже нещастя

Як на пресконференції ку новій премєрі повів драматурґ Купка, споминаны темы суть тіпічны і все актуалны в російскій літературі. Ку єдноактовці придав іщі пару мотівів із ґротесковых гуморесок о різных тіпах людей із раньой творчости Чехова.

В інсценації выступать єдина постава, курячій із пасії, Іван Івановіч Нюхин. „Даєме зрітельови псіхолоґічный портрет боязливого чоловіка, боягуза, назвав єм го тіпічный підпапучник, котрый не має силы выслободити ся спід надвлады свойой пановачной жены. Помочі може му лем чудо,“ сконштатовав драматурґ.

Як признав режісер Баллек, монодрама є його облюбленым жанром. І зато радо прияв пропозіцію продовжовати у своїй довгорічній співпраці з пряшівскым ТАД.

„Не знам чом, але про публіку суть найвдячнішы поставы неґатівны, боягузы. Радо в театрі смотриме на чудже нещастя, бавиме ся на людьскых недостатках. Тота інсценація то дає в поставі Нюхина, а навеце іде о префайну акторьску принагоду грати чоловіка одпудливого,“ додав Растіслав Баллек.

Образ цілой Росії

О шкодливости табаку буде по довгім часі першов премєров на Малій сцені ТАД. „На такій сцені тяжко дає ся зрітель оциґанити, є так близко актора, же тот не має де скрыти ся,“ повів головный протаґоніста Євґеній Либезнюк.

На сцені тот раз у годиновій пєсі Либезняк не буде мати жадного партнера. Монодраму буде грати першый раз у свойїй карьєрі. Подля нього образ роздвоєного чоловіка, якым є Нюхин, котрый має проблему з тым, жебы зошмарити із себе рабску покору, є образ цілой Росії, де панує традіція зробити маленькых людей барз нещастныма і невалушныма взяти свою долю до властных рук.

Як інформовав директор ТАД Маріян Марко, в далшім періоді Малу сцену чекать частіше вжываня. „Мі представліня на тій сцені люблять ся, будеме ту грати О двох ґенералох, Пісковиско, а спробуєме ту дістати і далшы пєсы з нашого репертоару,“ повів Марко.

О шкодливости табаку є в 79-ій сезоні Театру Александра Духновіча за порядком 401-ов премєров, першов у тім календарьнім році.