«Слово» – Неділя мясопустна – неділя, 9.00 год.

Третьов недільов приготовляючов нас на вступ до Святой Штиридцятніці є Неділя мясопустна або і Неділя Страшного суду. Днешнє слово Євенгелія нам представлять подію друго Хрістоого приходу з великов славов на землю.

Приходу не як маленкой дітинкы, але Царя неба і землі, жебы каждому оддати подля його діл. В часі земного жывота Господа ся люде ділили на дві стороны, тых, котры слухали і наслідовали Хріста, і тых, котры бунтовали ся, ненавиділи Хріста!

Тот поділ перетырвавать цілу історію Нового Завіта. Єдны на стороні Хріста, другы проти Хріста. Так буде і при другім приході. Буде людьство поділено на дві стороны. На праву і ліву. Святе Писмо называть на вівці а козлів. Вівці направо, а козлы наліво. Царь повість тым на правій стороні: Подьте, вы благословлены Мойого Отця, будьте наслідниками в моїм царьстві. Будьте богами зо мнов Богом. Будьте царями зо мнов Царьом. Будьте богатыма зо мнов Богатым. Жыйте у вічній любви зо мнов Любвов.

А давать причіну. Што буде тов крітерійов суду? Ту Ісус говорить: Я быв голоден, затлітый, хворый, нагый, подорожный, у вязніці. То є, я быв у нужді – а вы сьте мі помогли. Коли ся они чудують, коли ся таке стало, Ісус їм повість: каждому з тых найменшых, котрому сьте послужыли, то мі сьте то зробили. Вшытко проявліня чістой, щірой, милосердной любви ку ближнім – то мі сьте то зробили. Вы ся одорвали од самолюбства, еґоізму, з рабства гріха і страсти – жыли в любви. А теперь приймийте вічну нагороду. Мене самого і моє Царьство.

Но Царь ся оберне і ку тым наліво. А повість тоты самы слова а додасть, а вы сьте мі не послужыли. А так і тым дасть принагоду посліднього слова на суді. А они повідять: Господи, а де, же сьме тя виділи, а тобі не послужыли. Они чули зачудованя тых направо, і так як бы маючі в руках силный арґумент хотят ся боронити: де, же сьме тя виділи… А і їм повість: што вы не зробили, ани мі сьте не зробили. Вы сьте жыли лем про свої выгоды, роскошы, гріх і страсти. Вы сьте не виділи свойого ближнього в нужді. Вы сьте виділи лем себе. А так сьте ани мі не послужыли.

Кебы тоты на лівій стороні повіли: Маш правду, Господи, мы сьме не служыли тобі в нашых ближніх, мы лем свойому самолюбству служыли, але помилуй нас. Но так як покора першых говорить, де сьме тобі послужыли, жебы чули слово похвалы, так пыха другых не доволює повісти слова: маш правду, мы согрішыли. Бо они уж прияли служіня діаволу, і прияли його прґорам бунту, пыхы. Зато Ісус знаючі о їх непоправности ставить їх на ліву сторону. А адресує їм слова: Ідьте од мене прокляты до вічного огня, котрым приготовленый діаволу і його ангелам. А слово закончує: підуть єдны до вічных мук, а справедливы до вічного жывота.

Тото слово нам Церьков або сам Господь давать зо свойой любви. Абы ся позаставити, де ся находжу, на котрій стороні. А теперь є іщі час перейти з лівой на праву через покаяня. Покы іщі не зазвучіть тото страшне посліднє слово, приймиме тоты слова любви, абы нелажати ку тым – подьте, блажены, а не ку тым – ідьте од мене прокляты. Слава Ісусу Хрісту!

В неділю, 23. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. фебруара 2025 р. о 12.00 год. і 24. фебруара 2025 р. о 2.00 год. за русиньскым часом.