Русиньскый музей запрошать на фестівал книжок і нову выставу

Словацькый народный музей – Музей русиньской културы в Пряшові в місяці марец приготовлює дві події, на котры запрошать.

На 6-го марца 2025-го року музей рихтує Русиньскый книжковый фестівал, в рамках котрого буде мож выслухати лекцію Валерія Падяка. 13-го марца одбуде ся вернісаж новой выставы під назвов Акварелы непрофесіоналной художниці Светланы Стеранковой.

Книжковый фестівал

Як за музей інформовала Яна Трущіньска, СНМ – Музей русиньской културы уж традічно в марці організує Русиньскый книжковый фестівал, в рамках котрого презентує новы русиньскы выданя.

Тот рік в рамках той події музей припомяне собі і три юбілеї. 6-го марца буде мож в русиньскім музею выслухати лекцію під назвов Русиньскы великаны oчами доц. Мґр. Валерія Падяка, к.н.

Падяк зверне увагу на три особности і юбілєї – 190 років од народжіня Анатолія Кралицького, 160 років од смерти Александра Духновіча, і 50 років од смери Олены Мандіч-Шіналі.

Кралицькый, окрім того, же быв монахом – василіяном, быв і вызначным русиньскым писательом, прозаіком, етноґрафом, історіком, літературознательом, фолклорістом, але знати го може і як новинаря ці фотоґрафа.

Найвекшого русиньского будителя, котрого округлу річніцю смерти припомянеме собі в марці, представльовати не треба.

Олена Мандіч-Шіналі была першов Русинков, котра стала професіоналнов скулпторков у Чехословакії. Іщі як штудентка на высокій школі працовала над портретами і скулптурами русиньскых діятелів. Найвеце прославив єй бронзовый  памятник Томаша Ґаріка Масарика, презідента і основателя Чехословакії. „Верьшынов скулпторьской творчости Мандіч была скулптура Александра Митрака в Мукачові і бронзова пластіка Александра Духновіча в Пряшові,“ пише орґанізатор події.

Акварелы Светланы Стеранковой

Выстава Акварелы авторкы Светланы Стеранковой, буде приступна в музею до 14-го апріля, і їй кураторков є Анна Симкова.

Стеранкова у своїй творчости „проґрамово занимать ся техніков акварелу, в днешнім часі сприниманой як окрайовый, і аж барз простый способ умелецького выражіня,“ пише ся в пресовій справі ку выставі.

„Авторка зрозуміла акварел як повноцінне средство, котре уможнює їй повне вытварне і емоціоналне выражіня. Акварел став выражіньом їй умелецькой самобытности і певности.“

Як дале інформує музей, авторка „мала майже на самім початку ясно, што чує, і што хоче передати своїма образами. Нашла свою вытварну позіцію і помаленькы малює свою вытварну історію.“

Лекція Валерія Падяка і вернісаж выставы Светланы Стеранковой почінать в просторах СНМ – Музея русиньской културы в Пряшові о 16.00 год.