Потятка, сироты і Вівіенн. Першу персоналну выставу Вівіенн Варґовой рихтують в Празі

Вівіенн Варґова, художниця із русиньскыма корінями, одпрезентує свою першу песоналну выставу в просторах Дому народностных меншын в Празі.

Вівіенн Варґова народила ся в баницькім місті Ґелніця на выходній Словакії. Майже пять років жыла в Лондоні. Моментално жыє в Празі, де свої русиньскы коріня мішать із русиньскыма корінями ексцентрічного художника Норберта Тапперта (обидвоми хоснуть псевдонімы), якый так само походить із выходной Словакії.

В Домі народностных меншын в місяці май буде мож видіти выставу під назвов Потятка, сироты і Вівіенн, котра є їй першов персоналнов выставов. Якраз в тых просторах Вівіенн і Норберт у 2023-ім році зробили выставу, котра мала назву Близкы стрічі руснацького ступня, парафразуючі култовый філм Стівена Спілберґа Близкы стрічі третього ступня.

На своїй першій персоналній выставі Вівіенн Варґова представить творчость техніками колажи і акрілового монопрінта за послідній рік. Є фотоґрафков – самоуком, котра є захоплена алтернатівныма фотоґрафічныма процесами, якы їй припоминають алхімію. Окрему залюбу має в комбінованых техніках. Хоснує фотоґрафії з книг і часописів, а так само робить з властныма ґрафіками і фотоґрафіями – деконштруує їх, і пак їх реконштруує за помочі фарбы як візуалной стратеґії на створіня цілого сонного образу.

Централным мотівом є баданя переміны і поминутельности, ці у фізічных просторах або в періодах жытя. Творить медітатівны творы, котры бісідують о універзалній скушености гляданя, де творчость є рітуалом домова, де бы сьте лем не были.

„Думам, же аналоґова техніка має своє чаро, бо каждый твор є унікатный і не дає ся репродуковати цалком єднако. Хочу мати брудны рукы, брудный стіл, чути тото, што творю, вшыткыма змыслами,“ говорить художниця.

Вернісаж выставы Потятка, сироты і Вівіенн одбуде ся 1-го мая 2025-го року, і в Домі народностных меншын в Празі буде мож єй видіти до 15-го мая.