Сумар дня на 10. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 10. квітня/апріля 2025 р.

Поломництво грекокатоликів зо Словациі до Риму

В днях од 3. до 6. квітня/апріля проходила Народна Пут в Римі при нагоді Ювілейного Рока 2025. Понад 4 тисячы католицкых вірных зо Словациі перешло ювілейныма брамами в штырьох папскых базиліках. Медже нима было і много грекокатоликів, котрых вели владыкы Грекокатолицкой Церкви на Словациі вєдно зо священниками. В поломничестві брал участ Высокопреосвященный Йона Максим, пряшівскій архієпископ і митрополита, архієпископ Кірил Василь, кошыцкій єпарха, і владыка Мілян Лах, помічный єпископ братиславской єпархіі. Приміром в Базилиці св. Климента, де был похованый святый Константин – Кірил, і де доднес сут його мощы, вызвучала і молитва Отче наш по церковнославяньскы. В неділюю, кыр Йона одслужыл літургію в храмі св. Антония при папскій колеґіі Руссикум в Римі. Грекокатолицка Церков на Словациі в рамках Ювілейного Рока 2025 має запляноване іщы окреме поломництво для грекокатоликів до Риму, якє одбуде ся в днях 24.-27. жолнтя/октобра.

Выстава Вівіенн Варґовой, артисткы русиньского походжыня

Вівіенн Варґова, артистка з русиньскыма коренями, одпрезентує свою першу персональну выставу в просторах Дому Нацийональных Меншын в Празі. Вівіенн Варґова народила ся в баницкым місті Ґельниця на східній Словациі. Майже пят років жыла в Лондоні. Тепер жыє в Празі, де своі русиньскы корені мішат з русиньскыма коренями ексцентричного артисты Норберта Тапперта, якій так само походит зо східньой Словациі. В Празі буде мож видіти выставу під назвом «Потятка, сироты і Вівіенн», котра є єй першом персональном выставом. Як раз в тых просторах Вівіенн і Норберт в 2023 р. зробили выставу, котра мала назву «Близкы стрічы руснацкого ступеня», парафразуючы культовый фільм Стівена Спільберґа «Близкы стрічы третього ступеня». На своій першій персональній выставі Вівіенн Варґова представит творчіст техніками коляжу і акрильового монопрінта за послідній рік. Є фотоґрафком – самоуком. Вернісаж выставы одбуде ся 1. мая 2025 р., і буде мож єй видіти до 15. мая.

Бліхнарчане на великоднім Ярмаку в Варшаві

Як інформувал Кружок Сельскых Ґаздынь Бліхнарка і Приятелі, в послідню суботу члены Кружка мали нагоду репрезентувати ґміну Устя Рускє і реґіон на великоднім Ярмаку орґанізуваным Нацийональным Інститутом Культуры і Спадковины Села в Варшаві. Кружок запрезентувал очывидно лемківскы великодні традициі. Крам Бліхнарчан был прикрашеный по лемківскы, а при тым мож было видіти традицийні батканы великодні яйця.

Варштаты малюваня яєц в Рускій Бурсі в Ґорлицях

А уж в найблизшу неділю в Рускій Бурсі в Ґорлицях одбудут ся варштаты малюваня яєц. Традицийні стрічаме ся в Квітну Неділю, яка того рока выпадат 13. квітня/апріля. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый віск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!