Бесіды Сільвіі Бруні з Лемками #8 – Дария Кузяк

В четвер 24. квітня/апріля тр. о год. 9:15 просиме слухати бесіду з Дарийом Кузяк. Інтервю зробила Сільвія Бруні, польска Італиянка (або італияньска Полька), котра – захоплена Лемковином – рішыла як найліпше єй познати.

Дария Кузяк – композиторка, Лемкыня, молода активістка і аніматорка лемківской культуры. Абсольвентка композициі і теориі музикы в клясі проф. Ґражыны Пстроконьской-Наврартіль в Музичній Академіі ім. Кароля Липиньского во Вроцлаві. В своім доробку має близко двадцет камеральных і симфонічных творів, якы выконуваны были вчас ріжных концертів і фестівалів. Творчыня театральной і фільмовой музикы. Скомпонувала музику до фільму Ukołysaj в режысериі Мариі Мордарской, котрый был нагороджаный на фільмовых фестівалях. В своій творчости інспірує ся лемківскым фольклором.

Грат в ансамбли н’лем folk, котрый має на конті два альбомы – Подорож і мало не быти. Вельолітня членкыня Лемківского Ансамблю Пісні і Танця «Кычера», де грала на гушлях, а тіж помагала при орґанізуваню м.ін. Медженародного Фольклористичного Фестівалю «Світ під Кычером». В 2016 році здавала матуру з лемківского языка. Спілтворила ініциятиву Я Лемко, котрой цілю было заохотити Лемків, жебы выказували лемківску нацийональніст в Повселюдным Списі 2021. Членкыня неформальной ґрупы Захід, котра діє во Вроцлаві і зосереджат своі діяня для лемківской і украіньской молодежы через орґанізуваня ріжного рода подій, як напр. Лемконалиі ци Статочок.

В 2024 році заініциювала премєру свойой лемківской оперы Голос на два соловы голосы, лемківску капелю, камеральну оркєстру і електроніку.

«Лемківскы Оповісти: Мультікультурова Подорож через Сучасніст». То мультімедияльный проєкт, реализуваный в 2024 році, котрого цілю было приближыти культуру, історию і сучасне жытя Лемків. В рамках сериі возникло 10 авдийоподкастів, в котрых мож почути бесіды з поетами, активістами, професорами, тлумачами, молодым поколіньом Лемків.

За проєкт одповідала Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом была печатана перша антолоґія лемківской поезиі в тлумачыню на італияньскій язык. Подкасты доступны сут в польскым языку, товаришыт ім інтерактивна мапа на сайті siliva.lem.fm.