«Слово» – Неділя сліпого – неділя, 9.00 год.

Послідньов недільов пасхалного радостного часу є днешня Неділя сліпородженого. Так як і опередні неділі, і тота неділя, яке одношіня мать ку празднику Пасхы? На першый погляд може тото одношіня не видиме. А так знова заглубме ся над днешнім словом, жебы взяти про себе хосен, і увидіти, же то одношіня і повязаность із Пасхов є, а велика.

Ісус зо своїма учениками увидів сліпого од народжіня. Ученикы кладуть вопрос: хто согрішыв? Він або родічі? А Ісус, указуючі, же пришов не судити, але спасити, веде ку тому і учеників, жебы перестали думати неґатівно. Прото додавать: Ани він, ани родічі, але мають ся на нім выявити діла Божы.

Ісус хоче на тім сліпім вказати, же творить Божы діла. Але робить трохы чудным способом. Плювнув на землю, зробив болото, і послав умыти ся в Сілоамі. Чом такый процес собі Ісус выбрав. Но не без причіны. Хотів тым указати, же є тот самый сотворитель, котрый на початку сотворив чоловіка зо землі і вдыхнув йому безсмертну душу. Теперь бере глину і слину як образ нового сотворіня.

Зробив болото, помазав йому очі і послав умыти ся до Сілоаму. Коли так зробив, вернув ся видячім. Но такой выздравленый є взятый на допрошованя. Наперед сусіды і тоты, котры його виділи, звідують ся: Што ся то стало, хто тобі отворив очі? А він пояснив, як быв выздравленый. То образ тых, котры лем поверьхово суть зведавы о дачім, але не ідуть на глубину.

Другы – фарізеї, котры ся звідають, як ся ті отворили очі? А він їм одповідать. Повставать про Ісуса незлагода, єдны говорять, же є то од Бога. Дургы, не є од Бога, бо суботу не дотримує.

Треті, родічі, говорять: Мать свої рокы, най повість. То образ тых, котры хотять быти за добрі з міцьныма того світа. Ничім собі їх не погнівати.

Ісус приходить як дарователь світла. Нелем того тілесного, але духовного. Бо є двояка сліпота. Тілесна і духовна. Хрістос воскресшый є тот самый і днесь, приношать дар просвіщіня. Єдны його приймуть. Другы одверьгнуть. До котрой катеґорії належыме мы? Дайме сі правдиву одповідь. Хрістос воскрес!

В неділю, 25. мая 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. мая 2025 р. о 12.00 год. і 26. мая 2025 р. о 2.00 год. за русиньскым часом.