«Голосы Русинів Підкарпатя» – середа, 18.10 год.

Бісідуючі за свого нянька, леґендарного русиньского діятеля ІІІ. Ренесанса – Василя Сарканича, Михаіл Васильовіч Сарканич споминать за нього як за чоловіка, котрый быв файным педаґоґом, мудрым керовником.

За часы 30-річного перебываня Василя Сарканича на посаді директора Свалявского професійно-технічного учілища быв збудованый учебный корпус, інтернат, адміністратівный корпус, провела ся реконштрукція майстерень выробного учіня (1972 р.).

Ученикы учілища были переможцями областных шпортовых олімпіад, конкурзів технічной і художньой творчости. Дыховому орхестру учілища присвоєне было званя «Народный». Створены істинны меджінародны партнерьскы контакты з аналоґічныма учебныма установами Словакії, Літвы  і Росії.

Розповів Михаіл Сарканич, як у 1990-ых роках Василь Сарканич актівно зачав ся анґажовати в карпаторусиньскім общественнім русі. Майже 11 років вів Свалявске общество підкарпатьскых Русинів. То быв верьх популарности общества. Василя Сарканича знали, довіряли му многы  меценаты. Членами орґанізації были многы вызнамны бізнісмены і урядникы.

В школьскім році 2003/2004 за підпоры Карпаторусиньского научного центра США, під веджіньом головы Свалявского общества підкарпатьскых Русинів Василя Сарканича отворило ся першых пробных 9 класів, де 200 учеників учіли історію і културну дідовизну своїх предків – карпатьскых Русинів.

По смерти Василя Сарканича його сын Михаіл Сарканич сам став членом Свалявского общества підкарпатьскых Русинів, а од того року він є головов того карпаторусиньского общества.

Слухайте «Голосы Русинів Підкарпатя» в середу 28-го мая 2025 р. о 18.10 год., або повторіня в четверь 29-го мая о 4.30 год. і в суботу 31-го мая о 11.00 год. за русиньскым часом.