«Слово» – Неділя вшыткых святых – неділя, 9.00 год.

При вопросі, хто є то святый, може бы сьме одповіли, чоловік, котрого церьков выголосила за святого, ці то пророкы, апостолы, мученикы, преподобны. Котры выникали в близкости Богу. А кедь сі полжыме другый вопрос – односить ся то слово быти святым і ку мі?

То сі повіме – то є од мене далеко, та іщі може монахы, священыкы, єпіскопи. Але про мене слово святость – то є недостижна высота.

Но днешня неділя – вшыткых святых, нам не лем ставить перед нас множество святых прославленых в небі. Дакотрых познаме жывоты, о дакотрых не знаме, лем сам Господь знать. Але днешня неділя нам припоминать і обовязок каждого хрістіана быти святым. А повіме собі, як тото досягнути?

Днешнє слово Євангелія нам давать інструкцію ку святости. Ісус говорить о тім, коли є хтось пронаслідованый за імя Хріста а сміло Його вызнать, приголосить ся ку Хрістови, та і сам Господь наш давать слово, же ся ку такому приголосить перед своїм небесным Отцьом і вшыткына ангелами. А тыж, хто ся одрече перед людми, та од такого ся тыж одрече перед своїм Отцьом.

А далше Ісус говорить: хто не зненавидить Отця і матірь, братів і сестер про мене, не може быти моїм учеником, не є мене достойный. Слова, котры суть про нас силны, але што нам они говорять? Ісус ту говорить, же не лем коли звонка од неприятелів Хріста нас хтось пронаслідує, грозить выгнанством, муками ці вязніцов, або тыж і выгодами при одречіню ся Хріста, маме перебыти тверды у вірности і любви ку Хрістови.

Но тыж і тогды, кедь і нашы найблизшы бы нам были барьєров, одводили нас або ставили рішіня мы або Хрістос, маме выбрати Хріста перед тілесныма звязками. Так тото слово указує ту інштрукцію ку святости: поставити Хріста на перше місце у своїм жывоті: у своїх ділах, словах, думках. Або як учіть святый Василій Великый: жыти в Божій притомности. Вшытко робити на Божу славу. І найменше діло, котре робиме, робити як бы на Божых очах, а з тым усвідомліньом, же роблю через ближнього самому Господу.

А в тім є жывот святости: зростати в любви ку Богу, перебывати в обществі з Ним в каждій сітуації. І в тых найменшых ділах, о котрых повіме, тадь яку можуть мати заслугу перед Богом, повість собі жена, котра ся старать о обыстя, та што я можу великого зробити? Пороблю порядок, наварю мужови, дітям. Тадь мою роботу нихто ани не видить. Як через тото іти ку святости?

Св. Василій одповідать: нияка робота не є менше цінна, бо заслугує на небесне царьство. Коли єй робиме з любвов ку Богу а ближньому, мать перед Богом велику ціну. Вытырвати в Божій любви і вірности, і в часі пронаслідованя, прияти за Нього і Його слова і терпіня, і мукы, і выгнаня і смерть. Не дати ся збаламутити курточасныма выгодами духа світа як бы нагородов за одречіня од Хріста. Не дати ся збаламутити гріхом, роскошами, страстями, не ставити їх не місце Бога в нашім сердці і в нашій душі. Одречі ся вшыткого што нас хоче одділити од Хріста од Його любви.

То є про нас інштрукція ку святости подля днешнього слова. Тото розуміня і запрошіня ку тому нам давать Святый Дух, котрый, коли сьме отворены просвіщать нашы сердця, і указує дорогу святости. Слава Ісусу Хрісту!

В неділю, 15. юна 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. юна 2025 р. о 12.00 год. і 16. юна 2025 р. о 2.00 год. за русиньскым часом.