Слово» – 2-га неділя по Сошествії Святого Духа – неділя, 9.00 год.

Днешнє слово Євангелія нам указує подію, коли Ісус іде ку Ґалілейскому морю. Там стіртив Сімона Петра і його брата Андрія. Кличе їх: Подьте за мнов, я вас зроблю рыбарями людей. Яка была реакція тых двох рыбарів-братів? Зохабили вшытко а ішли за Ним.

Они мали в тім рыболові вшытко, мали своє забезпечіня жывота. Про них ловити а продавати рыбы значіло вшытко. А ту чуєме, на слова Ісуса они зохабили вшытко а ішли за ним. Лем на Його слова. Нич їм не пояснив. Та чекай, ты нас кличеш, а як буде з нами? З чого будеме жыти? Што значіть ловити людей? Нич з того они не розуміли, лем оперли ся на Його слова, котры глубоко проникали до їх сердець.

Але одповідають на тото покликаня рішіньом слободной волі. Ісус їх не силує, лем кличе. Они мали можность одвергнути тоты слова, поставити тісячі арґументів, же тото, што їм нукать Ісус, є шаленство. Но они нич таке не подумали. Увірили Хрістови а одповіли – ішли за ним.

Нескірше то Петро ясно досвідчів а Ісус його слова потвердив: Смоть мы зохабили вшытко а ішли за тобов. Ісус іде далше і видить далшых двох братів, но в іншій сітуації. Яков і Йоан вєдно зо своїм отцьом Зеведейом справляли сіті. Ісус їх кличе тыма самыма словами: Подьте а Я вас зроблю. А они як зареаґовали? Зохабили свої сіті і свойого отця а ішли за ним. Хоць не знали тыж што то значіть. Але любов ку його слову, сила його слова, котра їх проникала і кликала їх за Ним была велика. Они на ню так само рішіньом свойой слободной волі одповідають. А не было то легке. Выжадовало то жертву. Зохабити свого старенького отця. Хто ся о нього постарать? Што нас чекать? Як будеме жыти? Но они тоты вшытко якбы зохабляють за собов а смотрять лем на єдно, на його слова. Я вас зроблю.

В тых словах є покликаня і посланя. І стверджіня Господа: Я во вас дотворю тото діло. Мі старчіть лем ваша воля на то. А они єй давають. А нескірше видиме як были свідками чудесных діл і Його наукы а потім посланы далше проповідати і робити знамена і чудесны діла. І так ловити людьскы душы до сіті жывота. Но теперь є то перед нима скрыте. Но віров операють ся о Його слова.

Ісус і нас кличе. І нам говорить: подь за мнов. Я тя зроблю. Што значать тоты слова? Каждый є покликаный быти тым ловцьом душ там, де находить ся. Будь в якім віці, якім поставліню. Ці є то покликаня ку священству і монашеству, або покликаня ку хрістіаньскому жывоту. Ісус пожадує тото саме. Подь за мнов. Мене наслідуй. Приймай мої слова, жый подля них, дай мі ся доброволні. А я зроблю в твоїм жывоті велике діло.

Послухайме і мы слова, подь за мнов, жебы ся наповнили і слова: А я вас зроблю рыбарів людей. Слава Ісусу Хрісту!

В неділю, 22. юна 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. юна 2025 р. о 12.00 год. і 23. юна 2025 р. о 2.00 год. за русиньскым часом.