Михал Криницкій, Лена Круль і Мартина Хробак заняли першы місця в конкурсі «Я і Никыфор»

Закінчыл ся плястичный конкурс для діти, якій проходил під наголовком «Я і Никыфор». Знаме лявреатів! Задачом конкурсу было зазнаємити молодых артистів з особом і творчістю єдного з найславнійшых лемківскых малярів – Епіфаном Дровняком. Чысло надосланых робіт є доказом великого заанґажуваня діти і іх опікунів. Малюнкы были присланы зо шкіл в горах та од школярів, якы жыют на західніх землях Польщы. Орґанізатором конкурсу было Стоваришыня «Руска Бурса» в Ґорлицях.

Роботы были оціняны в трьох віковых катеґориях, а комісия в складі: Марта Криницка-Ожех та Анджей Жыґадло, стануло перед тяжком задачом выбраня найліпшых малюнків. Працы были оціняны анонімово, комісия знала лем чысло даного малюнку.

Діти як все заскочыли креативным підходом до темы, вражливістю на кольор, форму і знаньом навязаня до стилю Никыфора. «Вшыткы роботы были вынятковы, найтяжше было оцінити наймолодшых участників, бо знатя, же там емоцийональный наклад єст великій і кажду дітину хотіло бы ся за штоси выріжнити! Ґратуляциі для вшыткых участників!» – оповідат членкыня жырі, артистка Марта Криницка-Ожех. Вартат додати, што малярка перед роками сама брала участ в плястичных конкурсах орґанізуваных Стоваришыньом «Руска Бурса».

Учытелькы і опікункы діти, што брали участ в конкурсі, не крыли, што задача не была найлегша. «Для вельох діти стріча з творчістю Никыфора была першым кроком в страну наівной штукы, што вымагало од них не лем плятсичных здібности, але тіж зрозумліня такого способу смотріня на світ» – підкрисляли.

Вшыткым молодым артистам сердечні ґратулюєме і уж тепер запрашаме до участи в дальшых едициях конкурсу!

Результаты:

– катеґория І: предшколя та клясы 0-2

1. Михал Криницкій (школа в Устю Рускым)
2. Амелия Ґєлбаґа (школа в Высовій)
3. Мая Гутиряк (школа в Бодаках)