«Слово» – 5-та неділя по Сошествії Святого Духа – неділя, 9.00 год.

Слово днешнього Євангелія, коли Ісус Хрістос приходить до ґадариньского края і выздравлять двох опанованых демонами, указує нам, што ся може стати, кедь чоловік ся одверне од Бога.

Як Ісус вышов із лодькы, стрітило го двох опанованых демонами. Іншы євангелісты додовають, же были так розьїджены, же нихто ся не осмілив іти тов дорогов. Но, як Ісус там приходить, вшытка їх смілость перед притомностьов Сотворителя ся вытратила. А діавол через тых опанпваных кричіть: Што мі і тобі Ісусе, Сыну Бога Жывого, ты пришов ту передчасно нас мучіти? Бо Ісус наказав злому духу, жебы вышов з тых людей.

Тото слово нам ясно указує, же коли сьме з Хрістом не мусиме ничого бояти ся. Ісус і апостолом повів: Я вам дав владу топтати по гадах і шкорпіонах, а нич вам не пошкодить. Але быти з Хрістом значіть быти в неприятельстві зо злым духом. Бо не є общества меджі Хрістом і діаволом. Так і хто хоче належати Хрістови, не може быти в обществі зо злым духом.

Діаволы просили Ісуса, жебы їм доволив войти до свинь, котры ся пасли недалеко. А Ісус їм доволює. Они самы не могли войти, аж на доволіня Ісуа. А ціле стадо ся потопило у воді. Та чом Ісус доволив войти до свинь, коли ціле стадо свинь прпопало? Бо хоче нам подати і через тото далшу науку. А яку? Указує нам, же цільом діавола є нивочіти, вести до смерти, а то смерти вічной. Баламутиь чоловіка, жебы йому увірив. Указує на гріх, на роскошы, на привязаности, як на дашто добре. Кльопкать на двері сердця, жебы чоловік отворив а прияв то, што діавол нукать. А як чоловік прийме, тогды ся може стати з ним тото, што з тыма опанованыма. Же діавол опанує на Боже допущіня і тіло бідного чоловіка.

Но видиме ту і іншый способ, котрый діавол хоснує. Ціле місто вышло посмотрити, што ся стало. Як увиділи, же тоты люде суть выздравлены, но стадо свинь пропало, просять Ісуса, жеы одышов з їх края. Они ай кедь не были видимо опанованы, но невидимо через привязаня ку тому земному мав діавол над нима владу. Не хотять чути слово Хріста, ани быти в Його притомности.

Тото слово є хосенне і про нас. Ісус Хрістос пришов, жебы нивочів діла діавола. Жебы нам дав правдиву слободу од рабства гріха і діавола. Але Він стоїть при дверях нашого сердця і клопкать: чекать, ці йому отвориме, же царьовав в нашій душі. Чекать на рішіня нашой слободной волі. Ці приймеме Хріста, Його слово. Або як тоты жытелі того края: просили го, жебы одышов із їх края. А Ісус насів до лодькы і одышов. Прото мерькуйме. Бо так може быти і з нами. Слава Ісусу Хрісту!

В неділю, 13. юла 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. юла 2025 р. о 12.00 год. і 14. юла 2025 р. о 2.00 год. за русиньскым часом.