Сумар дня на 23. липця/юлия 2025 р.

Приносиме вам сумар медияльной ґрупы ЛЕМ.фм+ на ден 23. липця/юлия 2025 р.

Од Русаль до Яна в Зындрановій уж в вікенд

В суботу і в недію одбуде ся чергова едиция зындранівского свята – Од Русаль до Яна, котрого орґанізатором єст Музей Лемківской Культуры. В суботу ждут на вас: обзераня музею, промоциі книжок, выклады і прелекциі, а вечером заграют Kapela spod Rubani i ансамбль Alegro. Недільній проґрам зачне ся богослужыньом в місцевій церкви – храмі покровы св. Миколая, а по офіцийных выступлінях пополудне пройде при музиці ансамблів Łęczanie, Серенча, Стропковяне, Чендеш Орхестра і Капеля знад Ославы. Для діти заплянувано конкурсы і забавы. Вступне на подію дармо.

Ромы апелюют до премєра

Стоваришыня Ромів в Польщы заапелювало до шефа уряду, Дональда Туска, о рішучый сиґнал власти, же в польскій державі неє призволіня на дискримінацию, расизм ци ксенофобію та, же держава буде хоронила вшыткых громадян перед злочынами на ґрунті ненависти. Контекст розосланого до медий апелю напряменого до премєра, то – як подал ведучый стоваришыня Роман Квятковскій – маршы о антиіміґрацийным характері в польскых містах та адресуваны до Ромів через сусідів остережыня, жебы не выходили з хыж з огляду на ризико напасти. Квятковскій зазначыл, же ґрупа тота хоче ся чути безпечні в своій державі, а задачом правоохоронных орґанів має быти «успішна охорона каждого чловека перед насильством і дискримінацийом». Ведучый ромского стоваришыня потупил публичны выповіди політиків, котры «закликуют до ксенофобіі і баґателизуют єй соспільны наслідства». А в понедільок ректоры шестьох учелен зо шлезского воєвідства оприлюднили спільный апель, в котрым помістили занепокоіня насиляючом ся ворожістю взглядом міґрантів. Звернули увагу, што призволіня на язык ненависти може одберати почутя безпекы леґальным студентам і працівникам.

Варштаты лемківской культуры в Бортным

В вікенд в колибі в Бортным будут одбывати ся безплатны варштаты тыкаючы лемківской культуры. Прелекцию о істориі Лемків проведе Бортнян – Еміль Каня, він так само розповіст о камінярці, з котрого ремесла славне єст Бортне, і поведе прогульком по селі – слідом капличок, церкви і хыж. Місцевы ґаздыні вкажут тіж, як рыхтувати лемківскы традицийны стравы і як вышывали. На суботу заплянуване єст тіж огниско з лемківскыма співами. Орґанізатором варштатів єст колиба в Бортным.

84 і Бомбель на основі книжок Мирка Нагача, Дзяды і Ґміна Ґжешне до обзераня в Ждыни уж од зарани

Од зарани в Ждыни зачне ся друга едиция театрального фестівалю Ujście Kultury – Teatr i Góry, на котрый просит Меджепоколіньова Театральна Ґрупа Племя. В днях од 24. до 27. липця/юлия і од 1. до 3. серпня/авґуста, на обшыри Ватры одбудут ся показы спектаклів: 84, Бомбель, Бескідскы Дзяды та Ґміна Ґжешне. В рамках додатковых подій одбуде ся вернісаж выставы фотоґрафіі Катажыны Ґрисков та гулянка з музиком нажыво – пригрывал буде ансамбль Серенча. Вступне на спектаклі є білетуване, платніст готівком. «Най театр стрітит ся з горами, а люде з культуром» – просит Моніка Бабуля, думкодавчыня і директорка Фестівалю.