Поконґресова, але передватряна і передґожівска «Бесіда»

В тых днях вышла друком нова «Бесіда», ч. 4 (205) за місяці липец/серпен. В двомісячнику Стоваришыня Лемків, якій свойом передньом окладинком припоминат о завершеным 18. Світовым Конґресі Русинів, а заєдно кличе на 45. Лемківску Ватру на Чужыні, прочытаме м.ін. статі:

• Петро Трохановскій, Епифан Дровняк – Никыфор зас промовил;
• Петро Медвідь, В Пряшові собі пропомянули сто років од купліня Руского Дому. Просторы одкрыли ся для Русинів;
• Петро Трохановскій, Пошанувати Памят і труд тых, што о ню задбали;
• Петро Трохановскій, Памят жыва! Вічна я памят!;
• Петро Медвідь, Парлямент в Букарешті привитал ХVIII Світовый Конґрес Русинів;
• Петро Трохановскій, Димитрий Качор – хранитель народных перлин;
• Наталия Малецка-Новак, Лемківскій бадач лемківской штукы – др Михал Шымко!;

Окрем поданых статій в «Бесіді» найдете вельо інчого цікавого. То м.ін. част «Новины, не новины – не лем з Лемковины» інформуюча о найважнійшых подіях з русиньского світа, што одбыли ся за послідні два місяці – май і червец/юнй.

В части «Давна і сучасна русиньска/лемківска творчіст» на тот раз явило ся цікаве оповіданя, обогачене выімками поезиі, якого автором – подля аднотациі шефредактора «Бесіды» – являт ся Павел Ксенич. Тот текст рекомендуєме в першій черзі.

В літнім періоді дуже ся діє – прото окладинка кличе до участи в 45. Лемківскій Ватрі на Чужыні в Михалові, яка одбуде ся уж в днях 8.-9. серпня/авґуста, а тыжден пізнійше до Ґожова Великопольского, де 16. серпня/авґуста пройдут 31. Стрічы з Лемківском Культуром.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі по сконтактуваю з выдавцьом на сайті www.stowarzyszenielemkow.pl.