Сумар дня на 31. липця/юлия 2025 р.

Приносиме вам сумар медияльной ґрупы ЛЕМ.фм+ на ден 31. липця/юлия 2025 р.

Розпис креницкой церкви

Православна парохія св. Владиміра в Креници зачала першый етап іконоґрафічного розпису церкви. Як інформуют, працы зачали ся з благословліня владыкы Паісия, архієпископа перемышльско-ґорлицкой єпархіі. Креницка парохія рахує близко 50 осіб, зато тіж спільнота звертат ся до каждого, хто хотіл бы фінансово підпорити ведены працы. Кєд хочете помочы – деталів глядайте по контакті з креницком парохійом, якой парохом є о. митр. Петро Пупчык.

Петро Гербут розповідат во Вроцлаві о Лемках

Днес, в рамках стрічы Wroclove Toastmasters Лемко Петро Гербут розповіст о істориі і культурі Лемків. Стріча зачынат ся о год. 18.30 при ул. Свідницкій 43-45 во Вроцлаві. Вступне дармо. Петро Гербут походит з Михалова, што ся находит на Нижнім Шлеску, де каждого рока одбыват ся орґанізувана Стоваришыньом Лемків Лемківска Ватра на Чужыні. Прелеґент належыт до михалівского Кружка той орґанізациі. Заохочаме до участи!

Час лемківскых пленеровых подій

В минулый вікенд одбыли ся дві лемківскы подіі – 35. Лемківска Ватра в Лугах (любушскє воєвідство) та Свято «Од Русаль до Яна» в Зындрановій. Обі подіі, хоц єдна одбывала ся на землях выгнаня, а друга на Лемковині, притягнули вельох участників. А уж в наступный вікенд, в днях од 8. до 10. серпня/авґуста в Михалові одбуде ся 45. Лемківска Ватра на Чужыні. В пятницю на сцені запрезентуют ся Ластівочка з Пшемкова, Зоря з Устя Руского, Студенка з Калуша (Украіна), Серенча з Ґорлиц, Дуляровы Братя з Ґорлиц і Інтраде. В другій ден запрезентуют ся Кычерка з Ліґниці, Ластівчата з Пшемкова, польскій ансамбль Малы Ґожовякы, якій вказує і лемківскій фольклор, та Студенка з Калуша і Тераборсук з Пряшова. В суботній вечер ансамбль Ластівочка запрезентує пєсу «Дружбівскій Вечер». Забаву заграют два лемківскы ансамблі – Троянда і Водограй. Окрем того в проґрамі спортовы змаганя, конкурсы (в тым єден новаторскій – в формулі онляйн) та бесіды і выставы.

«Каменяре Кычеры» на цмонтери в Ґладышові

В минулым тыжни ґрупа «Каменяре Кычеры» при помочы Шымона Моджеєвского зо Стоваришыня Маґурич вела роботы на цмонтери в Ґладышові, де реставрували пару памятковых крестів. Працы тырвали такой цілый тыжден, а заанґажуваны были не лем Ґладышовяне, але тіж люде з сусідніх сел та молоды Лемкы з західніх земель. Ремонт дакотрых памятників є покля што зробленый на 85%, а 10 памятників было лем вмытых. Значыт, што правдоподібно роботы на ґладышівскым цмонтери будут продолжаны. О тым – кєд ґрупа «Каменяре Кычеры» рішыт дальшы працы – будеме очывидно інформувати.