Сумар дня на 12. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 12. серпня/авґуста 2025 р.

Ци в Низкым Бескіді буде нова роверова траса?

Звязок Ґмін Ґорлицкой Землі вышол з ініциятивом отворіня роверовой трасы VeloRopa. Проєкт VeloMałopolska то на тот момент вісем роверовых трас, котры ведут через цінны природничо ци туристичні місця. Проєкт новой трасы VeloRopa закладат, што зачне ся она в селі Ропа, при граници з новосандецкым повітом і закінчыт при граници з ясєльскым повітом. Додатково нова атракция мала бы додатковы стежкы до Мощениці, Санковой, Климківкы ци аж і Устя Руского. Як підкрислил ведучый Звязку Ґмін Ґорлицкой Землі та бургомайстер Ґорлиц, Рафал Кукля, од років самоурядовці з ґорлицкого повіту спілпрацуют з Воєвідскым Зарядом Доріг в Кракові, скорше при будові тротуарів  ци освітліня, а тепер час на робудову роверовой інфраструктуры. В часі стрічы бесідувано тіж о розбудові роверовых стежок в ґміні Устя Рускє. В тым році вказала ся думка поведіня VeloBiała до джерел рікы Біла на схылі Ляцковой, єднак доцільово траса закінчыт ся в Стружах.

Етно Малопольща 2025

Сут результаты тогорічной едициі «Етно Малопольща». В рамках конкурсу мож было ся старати о дофінансуваня на закуп облечыня або елементів реґіональных кроів. До тогорічной едициі конкурсу зголошено рекордове чысло внесків, аж 204 з чого дофінансуваня отримало 115 проєктів. Бенефіциєнты конкурсу окрем закупу облечыня зобовязаны сут до орґанізациі подіі цілю популяризациі культуровой спадковины Малопольщы. Серед выріжненых внесків нашли ся тіж тоты тыкаючы лемківскых тем. Дофінансуваня отримало Стоваришыня Промоциі Лемківской Творчости Серенча на реализацию задачы «Серенча на народно» та Фундация Захованя і Розвитку Нематерияльной і Духовой Культуры Лемків, што старала ся о дофінасуваня закупу облечыня для хору.

Села Репід і Лупків будут святкували 500 років локациі

Ґміна Команча передала, што в будучым році свій ювілей святкувати будут села Репід і Лупків. В обох селах жытелі будут святкувати 500 років локациі. Додатково вірны будут празднувати 200 років церкви св. Миколая Чудотворци в Репеди. На 2026 рік плянуваны сут торжественны упамятніня обох ювілеів. З той нагоды ґміна Команча просит каждого, хто лем хоче, поділити ся старыма фотоґрафіями звязаныма з Лупковом і Репедьом. То можут быти краєвиды, але тіж документация штоденного жытя селян. Описаны знимкы мож особисто приносити до уряду ґміны або переслати почтом. Фотоґрафіі будут частю публикациі та будут публикуваны на інтерентовым сайті ґміны.

Фільмовы Яслиска

Як што рока, в половині серпня/авґуста Яслиска зас станут ся серцьом фільмовой культуры. Подія зачне ся 15. серпня/авґуста одкрытьом двох выстав, єдной малярской «Кузня традициі – Стара хыжа» і другой фотоґрафічной «Найкрасшы словацкы грады». Вечером любителі кіна будут мочы обізрити три проєкциі. Головном частю другого дня фестівалю єст проєкция фільму «Трускавкове вино», котре того рока святкує 20 років. По презентациі  образу мож буде ся стрітити з режысером і акторами фільму. В проґрамі находят ся тіж атракциі для наймолодшых, зілярскы спацеры, варштаты і концерты. Цілю фестівалю єст промоция кіна, штукы і фільмовой творчости.