«Слово» – 10-та неділя по Сошествії Святого Духа – неділя, 9.00 год.

Коли Ісус Хрістос вєдно з трьома своїма учениками – Петром, Яковом і Йоаном, сходили з горы Тавор, де апостолы увиділи дашто незвычайне, бо увиділи славу Господа, і то лем частково, накільо были способны, теперь їх чекать іншый образ.

Там Петро не знаючі, што говорить, повів, Господи, добрі нам ту є, коли увидів славу Хріста а Мойсея і Ілію, як із ним бісідовали. Теперь, коли зышли з горы, увиділи множество народа, а даякого чоловіка, котрый приступив ку Ісусови і просить го за здравя про свого сына. Бо, говорить, як прийде нов місяця, тяжко терпить, дух його метать до огня і воды, жебы го загубив. А тот отець додав: Я його привів ку твоїм ученикам, а они го не могли выздравити.

На тоты слова Ісус озвав ся дость осро: О, невірне і чуджоложне, зоспуте поколіня, доколи іщі буду з вами, доколи вас мам терпіти? Чом Ісус так твердо реаґує на просьбу того нещастного отця? Што нам тым хоче повісти?

Тым, же тот чоловік перед вшыткыма знижує авторіту Хрістовых учеників, же они не были способны, а тыж говорить і самому Хрістосви, кедь можеш, помож нам. Він, видячі неспособность Його учеників йому помочі, переношать то і на самого Хріста. Засівать зерно невіры, же ту ани сам Хрістос нич не зможе. А накілько тото уж шкодило ділу Євангелія, Ісус озвав ся строго. Якбы говорив тому чоловіку і вшыткым, котры там ся находили, і были якбы інфікованы тым їдом невіры, котрый подавать тот чоловік.

Та я уж так довго перебывам із вами. Уж сьте виділи много раз, як єм выздравив многых од злых духів. Як злы духы кричали в страху: Ты Сын Божый. Чули сьте мої слова, же не мате бояти ся, бо моїм приходом є сила злого духа зничена. Чом тоды знову слухати його голос, котрый вам нашептавать, же ту ани Бог вам не поможе? Ту панує моя сила.

Зато Ісус называть їх невірне поколіня – бо легко переходять од віры, од захопліня, коли виділи його чудесны діла, ку невірі. Называть і чуджоложне, зоспсуте, бо зохабляють вірность Господу а допущають ся духовного чуджоложства зо злым духом.

Так Ісус давать привести того хлопця, котрый перед вшыткыма быв выздравленый. Головным посолством того днешнього слова є: Не маме вірити в силу зла, і кедь видиме коло себе якбы тоту надвладу зла. А не маме слухати тот діаволскый голос: Видите, ту ани Бог нич не зможе. Але маме вірити в силу добра, любви. Знаючі, же Бог тым котры Його люблять вшытко обертать на добре. А же послідне слово Буде мати Бог. Слава Ісусу Хрісту!

В неділю, 17. авґуста 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. авґуста 2025 р. о 12.00 год. і 18. авґуста 2025 р. о 2.00 год. за русиньскым часом.