«Голосы Русинів Підкарпатя» – середа, 18.10 год.

Слава Богу маєме на Підкарпатю не лем силну плеяду поетів, меджі котрыма суть дуже квалітны, талентованы, подесь і ґеніалны писателі. Суть, дякуючі Господу, такой музиканты, котры перераблюять русиньскый стих на співанку. Многы співанкы стануть гітами.

Антон Галас – єден із карпаторусиньскых бардів, котрый не обышов свойов увагов ани єдного веце-менше актівного русиньского поета. То і Леся Адамова, і Володимір Рошко, і Михаіл Чухран, і далшы. Та і сам Антон пише слова до своїх мелодій.

Як векшына Карпаторусинів, Антон поміняв за свій жывот много робот: быв і чіновником, і заробітчаном. Але як зачав з маленького у Малій Копані грати і співати, та і цілу свою жывотну путь перейшов зо співанков. А перша Антонова русиньска пісня «Білі ружі» взникла на слова Лесі Адамовой у 2019-ім році.

Про Галаса сакралныма суть родина, діти, внукы, мамка. Як сміючі ся каже сам наш герой: «Багатство моє – мої діти, внукы, гітара и біціклі».

Слухайте «Голосы Русинів Підкарпатя» в середу 27-го авґуста 2025 р. о 18.10 год., або повторіня в четверь 28-го авґуста о 4.30 год. і в суботу 30-го авґуста о 11.00 год. за русиньскым часом.