Омбудсман апелює: брак спійных принципів, котры реґулюют шкільництво для нацийональных меншын

Черговый раз Омбудсман звернул ся до Міністерства Нацийональной Едукациі, жебы зачали діяти і уреґулювали принципы, якы тыкают шкільництва для нацийональных і етнічных меншын. «Веде тото, до того, же в ограниченый спосіб мож орґанізувати вчыня свого языка, істориі і культуры» – підкрислят Адам Кжывонь.

Заступця Омбудсмана Адам Кшывонь в выступліню до ресорту едукациі звернул увагу, же конечне єст допрецизувати переписы уставы.

«Тепер, коли єст неясный правный стан, меншыновы середовиска боят ся, же вельолітня практика, основом якой єст поміщаня в статуті публичной школы постанову, што вшыткы школяре обовязково вчат ся языка меншыны, буде заквестийонувана тіж в однесіню до шкіл, в котрых занятя ведены сут в языку меншыны» – звернул увагу Омбудсман.

Омбудсман припомнул, же Комітет Міністрів Рады Европы закликал Польщу, жебы скоро піднала діяня і жебы заґарантувала едукацию на вшыткых етапах едукациі в языках: білорускым, німецкым, кашебскым, лемківскым і украіньскым як языку вчыня.

Кшывонь подал тіж, же в єдній зо шкіл для мешнын тымчасово ввели розвязаня в формі педаґоґічного експерименту – значыт обняли обовязковом науком языка меншыны вшыткых школярів ліцею, котры ся зголосили.

«Тото розвязаня, хоц часово позвалят одтяжыти соспільніст меншыны, жебы заховати дотеперішній характер школы, не розвязує проблему браку спійности принципів, котры реґулюют шкільництво для мешнын, што сут вымінены в уставі – Освітове право і в уставі о системі освіты» – підкрислил.

Омбудсман засиґнализувал, же брак одповідніх уреґулювань в однесіню до орґанізациі шкільнцитва меншын неґативні влият на стабільніст функцийонуваня не лем публичных шкіл, в котрых вчыня яызка меншын ведене єст в додатковій формі ци в двоязычній, але тіж шкіл, в котрых наука ведена єст в языку меншыны.

Адам Кшывонь черговый раз написал до Міністерства Едукациі, жебы подали інформациі в тій справі.

В попередній одповіди ресорту едукациі віцеміністра Катажыня Любнауер поінформувала, же устава о системі освіты в арт. 44q окрислят условія скінчыня учеником выжеосновной школы. Ученик кінчыт выжеоснсовну школу, коли отримат зо вшыткых обовязковых едукацийных занять та з занять з меншынового або реґіонального языка позитивны клясифікацийны оціны.

В примірі, коли даный школяр кінчыт школу в пляцівці, де ведене єст вчыня меншынового языка, а зложыл в одповіднім терміні освідчыня о резиґнациі з наукы меншынового языка, на свідоцтві не буде міг мати подану кінцьову клясифікацийну оціну з того предмету. В звязку з тым ученик не має обовязку підходити до матурального іспиту з меншынового языка як обовязкового предмету. Може єднак здавати матуру з даного меншынового языка здаваного як додатковый предмет, кєд буде мал такє желаня.