«Варголь, якого не знате» – выстава в Pop Culture Gallery в Старым Броварі в Познані

Од середы 11. вересня/септембра 2025 р. в Pop Culture Gallery в Старым Броварі в Познані мож обзерати выставу пн. «Andy Warhol: A Kind of Retrospective». То дія, котра – як підкрислят Марта Кабш-Нєдбальска, PR Manager Старого Бровару, має одчарувати загальне уявліня о Варголи і вказати, же за іконами поп-арту ховат ся шыршый, богатшый світ творчости.

Велику ролю в рыхтуваню познаньской експозициі одограл куратор Войтек Пьотр Онак. Пару місяців старал ся позыскати творы од приватных властителів і колекцийонерів, а тіж од престіжных інституций культуры. Завдяку тому в Познані мож обзерати унікальный выбір творів Варголя – в тым вельо робіт, якы не были скорше в Польщы вказуваны.

«Векшына осіб, коли чує назвиско Варголя, видит банькы поливок Campbell або Мерилин Монро. А то прецін артиста, котрого доробок не містит ся в єдній шуфлядці. Выстава вказує його еволюцию – од ілюстратора, комерцийного ґрафіка, по творцю, котрый сам остал твором штукы» – бесідує Марта Кабш-Нєдбальска.

Куратор зрыхтувал пару секций. На першым пляні находит ся обшырна ось часу, на котрій приватне жытя Варголя переплітат ся з його карєром – од 50. років ХХ ст., коли ілюструвал маґазины і книжкы для діти, по 80. рокы, коли был уж символом нюйоркской богемы. «То барз важне, бо вказуєме Варголя не лем як артисту, але тіж чловека, котрый дозрівал в захопліню славом, вытинал знимкы акторів, а пак сам творил целебритів» – додає Кабш-Нєдбальска.

Чергове плянтро в цілости посвячене єст штуці відео. Завдякы спілпрацы з Музейом Варголя в Пітсбурґу можа видіти м.ін. леґендарды «Screen Tests» – короткы відеопортреты, в тым тот зо Сальвадором Далі. «То штоси, чого не видиме наштоден. Для вельох гостів тота част буде найвешкым заскочыньом» – пояснят представничка Старого Бровару.

Не бракує і навязаня до маґазину «Interview», якій основал Варголь, і котрый был не лем часописом, але і маніфестом його філософіі славы. «Варголь сам в собі был марком. Свідомі будувал свій імідж, а выстава вказує як консеквентні тото робил».

Выбір місця на експозицию то не припадок. «Pop Culture Gallery в Старым Броварі то простір в серци гандльового центра, обік бутіків і марок, котры навязуют до попкультуры. То ідеальный контекст для Варголя, котрый штуку і комерцию знал лучыти як нихто інчый» – подає PR Manager Старого Бровару.

Выставу мож обзерати до кінця лютого/фебруара 2026 рока. «То лем пару місяців, протягом котрых хочеме вказати Варголя в цілым спектрі. Для вельох буде то перша на таку скалю стріча з артистом. Надію ся, же выйдут з выставы з думаньом, што Варголь то не лем поп-арт, але тіж захоплююча істория о модерным світі» – підсумовує Марта Кабш-Нєдбальска.

«Andy Warhol: A Kind of Retrospective то выстава збудувана довкола основного звіданя: в якій спосіб творчіст єдного артисты пересякнула так вельо обшыри сучасного жытя і чом його візиі дале діют з таком силом? Instagram, YouTube, reality show, selfie, віральовый зміст, онляйновы таблоіды – цілый тот світ оперує днес подля принципів, якы достерюг Варголь і урухомил десяткы років тому. Серийніст, інсценізация штоденности, плынна медияльна ідентичніст, економія видимости – тото вшытко уж было. Лем же чорно-біле як в поляроіді, в тринадцетгодинным фільмі без акциі, в штучні утырваленым усміху на серіґрафіці. Сучасна попкультура то його робота, аж і кєд він сам о тым не може знати» – бесідує Войтек Пьотр Онак, куратор выставы.