Епіфан Дровняк з приватной колекциі. Выстава в Зеленій Горі

Іщы лем до 9. жолтня/октобра мож в Музею Любушской Землі в Зеленій Горі видіти унікатову выставу образів Никыфора, котры походят з приватной колекциі. Векшыну презентуваных робіт Епіфан Дровняк намалювал в меджевоєнным періоді, котрый знавці узнают за найліпшый етап в його творчости.

«Никыфор. Феномен саморідного таланту» то выстава, котрой вернісаж прошол в пятницю 12. вересня/септембра 2025 рока. Вказує выбраны роботы з приватной колекциі Роберта Довгана. Збірка чыслит 50 робіт.

«130. річниця народин Никыфора, яка припадат на тот рік, єст знаменитом нагодом, жебы оддати чест для доробку того незвыклого артисты. Для нас єст важном, бо послідня презентация його робіт в нашым музею, зорґанізувана товды во спілпрацы з Музейом Сандецкой Землі в Новым Санчы, была аж чвертину столітя тому» – подає пресовый представник Музею Любушской Землі в Зеленій Горі, Ігор Морє.

Презентувана колекция обнимат м.ін. роботы, якы зачысляны сут до найбарже ціненых серий, такых як архітектонны пейзажы фантастичных міст, настройовы видокы Крениці з характеристичныма деревяныма віллями і пенсийонатами, многообразны сцены – в середині хыж, церкви, автопортреты, виды святых ци інчы сценкы. В колекциі єст тіж унікатова робота – пращальный лист.

На одкрытю выставы, кураторка експозициі і робітничка департаменту сучасной штукы в Музею Любушской Землі, Марта Ґавенда-Шыманяк, підкрислила, што: «Никыфор был самоуком, з походжыня Лемком. (…) З часом го одкрыли і доцінили не лем в нашій державі, але тіж на світі. В його роботах видно чудове вычутя кольору і велику творчу пристраст».

Малюваня было для Епіфана Дровняка цілым жытьом і способом на перетырваня. Єст приниманый за ікону наівного реализму. Своі першы роботы зачал малювати іщы перед 1917 роком. Малювал на розмаітых материялах. Подля ріжных обрахунків, намалювал веце як 40 тис. робіт, в тым акварелі і ґвашы (малюнкы водяном фарбом з додатком крейды або білила). Годинами сідил в публичных місцях Крениці з розставленым малярскым варштатом.

Малярство Епіфана Дровняка цінят предовшыткым за унікальну і красну фаребну палету. Його роботы вказуваны сут по цілым світі, інспіруючы черговы поколіня артистів.

Фот. Пресовы материялы орґанізатора: Музей Любушской Землі в Зеленій Горі